Мубин Эргашев: «Мо ба дастгирии мухлисон умед дорем»

0
439 просмотров

Сармураббии мунтахаби олимпии Тоҷикистон (U-23) Мубин Эргашев дар остонаи оғози марҳилаи интихобии Ҷоми Осиё-2024 дар гурӯҳи «I» аз тамоми мухлисон даъват кард, ки дастаро дастгирӣ кунанд. Мунтахаби мо барои роҳ ёфтан ба қисми ниҳоии қаҳрамонии Осиё бо дастаҳои Лаос (9 сентябр) ва Австралия (12 сентябр) бозӣ мекунад. Ин вохӯриҳо дар Варзишгоҳи марказии Душанбе баргузор мешаванд.

Мубин Эргашев, сармураббии мунтахаби олимпии Тоҷикистон (U-23):
– Дар гурӯҳи мо ҳамагӣ се даста ҳаст. Рақибон заиф нестанд, бояд ба ҳар як даста эҳтиромона муносибат кунем. Бозиҳои гурӯҳӣ шадид хоҳанд буд, аз ин рӯ натиҷаи ҳар як бозӣ аҳамияти калон дорад. Имсол ҳамагӣ ду ҷамъомади таълимӣ доштем. Аз сабаби он ки дар рӯзҳои ФИФА як гурӯҳи бозигарон ба ҳайати мунтахаби кишвар ҷалб шуда буд, мо имкони бозӣ кардан надоштем. Танҳо дар ҷамъомади таълимию тамринии моҳи июн бо ҳамсолони худ аз Ҳонконг ду бозии дӯстона баргузор кардем.
Ҳоло даста дар ҳолати хуб қарор дорад. Вақте Манучеҳр Сафаров ва Рустам Соиров ба даста пайванданд, бо ҳайати пурра ҷамъ мешавем. Аз бозӣ ба бозӣ омода хоҳем шуд. Рақиби якуми мо тими миллии Лаос аст. Бозиҳои ин тимро тамошо кардаем. Инчунин имкон дорем, ки бозии Лаос – Австралияро дар даври аввал тамошо намуда, хулоса барорем.
Аз фурсат истифода бурда, тамоми мухлисонро ба бозиҳои дарпешистодаи интихобӣ даъват менамоям. Мухлисон бозигари дувоздаҳуми даста мебошанд, бинобар ин мо ба дастгирии онҳо умед мебандем. Аз тарафи худ ваъда медиҳем, ки тамоми қувваамонро дар майдон сарф мекунем ва то дақиқаи охирин мубориза мебарем.
Манбаъ: Варзиш-ТВ

Нет комментариев

Также рекомендуем

Сообщить об опечатке

Текст, который будет отправлен нашим редакторам: