Мулоқоти Раҷаббой Аҳмадзода бо сокинон ва фаъолони шаҳри Хуҷанд

0
2 771 просмотров

8 феврали соли 2021 Раиси вилояти Суғд, муовини якуми Раиси Маҷлиси миллии Маҷлиси Олии Ҷумҳурии Тоҷикистон Раҷаббой Аҳмадзода ҷиҳати тарғиби муҳтавои Паёми Президенти Ҷумҳурии Тоҷикистон бо сокинон ва фаъолони шаҳри Хуҷанд мулоқот намуд.

Мулоқоти муовини якуми Раиси Маҷлиси миллии Маҷлиси Олии Ҷумҳурии Тоҷикистон Раҷаббой Аҳмадзода бо сокинони маркази вилоят дар Кохи Рӯдакӣ сурат гирифт. Зимни мулоқот таъкид карда шуд, ки мақомоти иҷроияи ҳокимияти давлатии вилоят ҷиҳати тарғиби муҳтавои Паёми Пешвои миллат Ҷадвали гузаронидани вохўрии аъзои Маҷлиси миллии Маҷлиси Олии Ҷумҳурии Тоҷикистон ва ҳайати гурўҳи тарғиботию ташвиқотии вилоятро аз 29-уми январи соли 2021 таҳия намуд ва дар асоси он дар саросари вилоят бо аҳолӣ мулоқотҳо баргузор шуда истодаанд.

Раҷаббой Аҳмадзода аснои мулоқот бо сокинони Хуҷандшаҳр таъкид кард, ки Паём ҳуҷҷати барномавии сиёсиест, ки дар баробари арзёбии вазъи ҷомеа ва давлат нигоҳи Сарвари давлатро доир ба роҳҳои рушди на танҳо имрўза, балки стратегии кишвар ва ҳамчун ҳуҷҷати барномавии ҳуқуқӣ таклифҳои мушаххасро, ки ба фаъолияти қонунгузорӣ рабт доранд, ифода менамояд. Мазмуну мундариҷа ва муҳтавои Паём аз лиҳози сохтор тамоми масъалаҳои марбут ба сиёсати дохилӣ ва хориҷии кишварро дар бар мегирад.

Гуфта шуд, ки дар Паёми имсола Пешвои муаззами миллат муҳтарам Эмомалӣ Раҳмон бо таҳлили дақиқ, натиҷагирии асоснок ва масъалагузориҳои мушаххас самтҳои муҳимми сиёсати дохилӣ ва хориҷии кишвар, аз ҷумла роҳҳои рушди соҳаҳои иҷтимоию иқтисодии мамлакат ва вазифаҳои навбатиро муайян намуданд, ки ҳадафи он татбиқи манфиатҳои миллӣ ва боз ҳам баланд бардоштани сатҳи некўаҳволии мардум аст.

Паёми имсолаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии кишвар дар шароити ноустувори иқтисодию иҷтимоии ҷаҳон, ки бар асари хуруҷи бемории ҳамагири пандемияи COVID-19 ба миён омадааст, ироа гардид. Дар натиҷаи паҳн шудани бемории сироятии коронавирус ба дараҷае паст рафтани фаъолнокии иқтисодӣ ва афзоиши бесобиқаи бекорӣ вазъияти сайёра боз ҳам печида гардида, кишварҳои олам ба буҳрони бисёр шадиди иқтисодиву молиявӣ ва иҷтимоӣ рў ба рў омаданд.

Чуноне, ки дар Паём таъкид шуд, бо вуҷуди таъсири манфии омилҳои зикршуда, дар натиҷаи амалӣ гардидани тадбирҳои таъхирнопазир аз ҷониби Ҳукумати кишвар устувории нишондиҳандаҳои макроиқтисодӣ таъмин гардида, дар самти беҳтар намудани сатҳу сифати зиндагии аҳолӣ тамоюлҳои мусбат нигоҳ дошта шуданд.

Иқтисодиёти кишвар дар соли 2020-ум 4,5 фоиз афзоиш ёфта, ҳаҷми маҷмўи маҳсулоти дохилӣ ба 82,5 миллиард сомонӣ баробар гардид.

Дар ин давра ба ҳаҷми 9,7 фоиз афзоиш ёфтани истеҳсоли маҳсулоти саноатӣ, ба ҳаҷми 8,8 фоиз маҳсулоти кишоварзӣ ва ба ҳаҷми 0,8 фоиз таъмин шудани гардиши савдои хориҷӣ, аз ҷумла содирот дар ҳаҷми 19,8 фоиз заминаи рушди иқтисодии кишварро ба вуҷуд оварданд.

Хусусан, истеҳсоли озуқаворӣ нисбат ба соли 2019 -ум 28,3 фоиз афзоиш ёфта, ба беҳтар таъмин шудани бозори дохилӣ бо маҳсулоти ватанӣ мусоидат намуд.

Ба соҳаҳои гуногуни иқтисоди миллӣ дар ҳаҷми умумии беш аз 5,4 миллиард сомонӣ сармояи хориҷӣ, аз ҷумла 1,3 миллиард сомонӣ сармояи мустақими хориҷӣ ҷалб карда шуд.

Соли гузашта 300 коргоҳу корхонаи нави саноатӣ бо беш аз 6500 ҷойи корӣ, 157 муассисаи таҳсилоти миёнаи умумӣ ва биноҳои иловагӣ барои 63 ҳазор нафар хонанда, 108 муассисаи тиббӣ ва ба масоҳати беш аз 1,2 миллион метри мураббаъ манзили истиқоматӣ сохта, ба истифода дода шуданд.

Дар ин давра зиёда аз 193 ҳазор ҷойи кори доимӣ ва мавсимӣ ташкил карда шуда, даромади пулии аҳолӣ 10,0 фоиз афзоиш ёфт.

Соли 2020 дар саросари кишвар 18300 иншооти истеҳсолӣ, иҷтимоӣ ва фарҳангии ба истиқболи ҷашни 30-солагии истиқлол ба нақша гирифта шуда, ки бештари онҳо иншооти соҳаҳои маориф, нигаҳдории тандурустӣ ва варзиш мебошанд, бунёд ва ба истифода дода, бо ҳамин роҳ даҳҳо ҳазор ҷойи нави корӣ муҳайё карда шуданд.

-Таҳти роҳбарии хирадмандонаи Пешвои муаззами миллат дар даврони соҳибистиқлолии кишвари азизамон имкон фароҳам омад, ки сиёсати давлат дар самти таъмини рушди бонизоми бахши воқеии иқтисодиёт комилан тағйир ёфта, суботи макроиқтисодӣ нигоҳ дошта шавад.

Дар соли 2020 барзиёд таъмин шудани аксар нишондиҳандаҳои асосии макроиқтисодии вилоят аз татбиқи босамари сиёсати дурандешонаи Сарвари давлат дар вилоят дарак медиҳад. Аз ҷумла, дар соли сипарӣ ҳаҷми маҷмўи маҳсулоти минтақавии вилоят ба 21,6 миллиард сомонӣ ва суръати афзоиши он ба 104,5 фоиз баробар шуд.

Дар соҳаи саноат таваҷҷуҳи асосӣ ба тақвияти истеҳсолот ва содироти маҳсулоти тайёр бо роҳи ворид намудани технологияҳои нав, истифодаи ҳарчи бештари манбаъҳои ашёи хоми маҳаллӣ, коркарди пурраи он ва истифодаи васеи захираҳои меҳнатӣ равона гардида, дар соли 2020 ҳаҷми истеҳсоли маҳсулоти саноатӣ ба 15 миллиарду 401,5 миллион сомонӣ расонида шуд ва суръати афзоиш бо назардошти индекси нархҳо 117,4 фоиз таъмин гардид.

Соҳаи кишоварзӣ яке аз самтҳои асосӣ ва афзалиятноки пешбурди иқтисодиёти вилоят маҳсуб ёфта, нақши он дар таъмини амнияти озуқаворӣ, рушди соҳаҳои саноат, афзоиши имкониятҳои содиротии вилоят ва таъсиси ҷойҳои нави корӣ хеле муҳим аст.

Кишоварзони вилоят ҷиҳати таъмини рушди соҳа тадбирҳои судманд андешида, ҳаҷми истеҳсоли маҳсулотро дар соли 2020 дар ҳамаи шаклҳои хоҷагидории вилоят ба 10 миллиарду 821,0 миллион сомонӣ расониданд, ки баробари 110,5 фоизи ҳамин давраи соли 2019 мебошад.

Дар соли 2020 дар вилоят дар самти сохтмони иншооти соҳаҳои иҷтимоию фарҳангӣ ва истеҳсолӣ новобаста аз мушкилоти ҷойдошта фаъолияти мунтазам ба роҳ монда, маблағгузорӣ ба сармояи асосӣ дар ин давра дар ҳаҷми 1 миллиарду 279,9 миллион сомонӣ азхуд шуд ва ба маблағи 506 миллион сомонӣ корҳои пудратӣ иҷро карда шуданд. Ҳамагӣ ба маблағи 1 миллиарду 8,9 миллион сомонӣ фондҳои асосӣ ба истифода дода, суръати афзоиш нисбат ба соли қаблӣ 134,2 фоиз таъмин гардид.

Дар ин муддат аз ҳисоби ҳамаи сарчашмаҳо 434,4 ҳазор метри мураббаъ манзил ба истифода дода шуда, барои 660 ҷойи нишасти талаба дар муассисаҳои таълимии таҳсилоти миёна, барои 510 ҷой дар муассисаҳои таҳсилоти томактабӣ ва 307 кат дар шифохонаҳо иқтидорҳои иловагӣ ба истифода дода шуданд.

Тибқи нақшаи чорабиниҳо ба истиқболи ҷашни 30-солагии Истиқлоли давлатии Ҷумҳурии Тоҷикистон дар вилоят бунёд ва таҷдиди 7190 иншооти ҷашнии истеҳсолию иҷтимоӣ пешбинӣ гардидаанд. Аз ҷумла, бунёд ва азнавбарқароркунии қасрҳои фарҳанг ва боғҳои фарҳангӣ, коргоҳу корхонаҳои дўзандагӣ ва коркарди шир, толору майдончаҳои варзишӣ дар ҳар як деҳа, маҳалла ва назди биноҳои баландошёна амалӣ шуда истодааст.

Дар соли 2020 бунёд ва таъмиру таҷдиди 1926 иншоот ба нақша гирифта, амалан 1972 иншоот ба истифода дода шуд, ки 102,4 фоизи нақшаи солонаро дар бар мегирад. Дар маҷмўъ, то ин давра 5990 иншооти гуногун ба истифода дода шудааст, — иброз дошт Раиси вилоят.

Раҷаббой Аҳмадзода ҳамзамон оид ба рушди соҳаҳои илму маориф, фарҳанг, тандурустӣ, роҳу нақлиёт, соҳибкорӣ, сайёҳӣ, варзиш, дастгирии иҷтимоии нафақахўрону маъюбон, кўдакони ятим ва оилаҳои камбизоат, ҳимояи марзу буми давлат, таъмини амнияти давлату миллат ва ҳифзи суботу оромии ҷомеа, пешгирӣ ва бартараф кардани ҳама гуна таҳдиду хатарҳои берунӣ ибрози андеша намуда, изҳори боварӣ намуд, ки сокинони шаҳри бостонии Хуҷанд дар амалӣ намудани нуктаҳои Паёми Президенти Ҷумҳурии Тоҷикистон муҳтарам Эмомалӣ Раҳмон саъю талош намуда, бо дастовардҳои шоиста 30-солагии Истиқлоли Тоҷикистони азизамонро истиқбол менамоянд.

Манбаъ: Хадамоти матбуоти Раиси вилояти Суғд

Нет комментариев

Также рекомендуем

Сообщить об опечатке

Текст, который будет отправлен нашим редакторам: