Шумо бо кӯдаконе, ки дар рӯй ва баданашон маҳлули сурхчатоб, баъзан кабуд (зелёнка) молидаанд,шояд рӯ ба рӯ шуда бошед. Ин намуди беморӣ обакон (ветрянка, ветрянная оспа) ном дошта, он бемории шадиди гузаранда маҳсуб мешавад. Бемории обакон бо табларза ва дар рӯйи пӯст пайдо шудани луобпарда зоҳир мегардад.
Зумрад Раҳимҷонова — пизишки оилавӣ
Тавре пизишки оилавии Маркази саломатии рақами 6-уми шаҳри Хуҷанд Зумрад Раҳимҷонова мегӯяд, ба ин намуди беморӣ бештар кӯдакони аз 1 то 5 сола гирифтор шуда, давраи хурӯҷи он аввали фасли баҳор ва фасли зимистон мебошад.
Зумрад Раҳимҷонова қайд намуд, ки бемории «Обакон» ба гурӯҳи бемориҳои сироятӣ ворид шуда, он аз шахси бемор тавассути ҳаво метавонад гузарад. Давраи табобати беморӣ аз 11 то 12 рӯзро дар бар гирифта, муддати авҷгирии беморӣ 4 — 7 рӯз идома мекунад.
Тавре номбурда иброз намуд, доначаҳо баъди рӯзи дуюми гирифторшавӣ ба ин намуди беморӣ дар рӯи пӯст пайдо шуда, дар шахси мубталои ин беморӣ баландшавии ҳарорат (то 38°С) мушоҳида карда мешавад. Баъзан ба ин беморӣ метавонанд калонсолон низ гирифтор шаванд. Ҳангоми гирифтор шудан ба бемории обакон, бистарӣ намудани шахси бемор ва парҳезкунӣ ҳатмист.
Муолиҷаи бемор дар шароити хона гузаронида шуда, ба бемор тановули хӯрокҳои шӯр ва турш манъ аст. Гармкунии бадан низ хафнок мебошад. Зеро ҳар чӣ қадар бемор гарм шаваду баданаш арақ кунад, ҳамон қадар дар бадани ӯ ҳубобчаҳо зиёд мегарданд. Бояд ҳавои хонаро зуд-зуд иваз намуда, бо латтаи тар фарш ва рафҳоро аз чангу ғубор тоза кард.
Доначаҳое, ки дар рӯйи пӯсти бемор пайдо шудаанд, бояд бо маҳлулҳои спиртии анилинӣ, сабзранг (зелёнка) ва перманганати калий тоза карда шаванд. Бояд қайд намуд, ки дар ин муддат истифода бурдани ҳаб (таблетка)-и аспирин нашояд. Табибон ҳангоми баландшавии ҳарорат паратсетамол ва ибупрофенро тавсия медиҳанд.
Муолиҷаи обакон дар хона
Дар шароити хона, метавон кӯдакро бо гиёҳи бобуна ва календула муолиҷа намуд. Ба бемор нӯшонидани шарбати лимӯи бо асал омехташуда хеле мувофиқ аст. Ҳамчунин, истеъмоли афшураи тути заминӣ манфиатовар мебошад. Гиёҳи ҷаъфарӣ (петрушка)-ро қимма карда (1-2 қошуқ), ба зарфи нимлитра ҷойгир карда, ба болояш оби ҷушонидашударо мерезед. Онро андаке нигоҳ дошта, баъд 1-2 қошуқчагӣ, дар як рӯз 3 маротиба ба кӯдаки бемор менӯшонед. Дар ин муддат истеъмоли мумиё низ аҳамияти калон дорад. Зарур аст, ки 0,1 г мумиёро дар 10 мл оби гарми ҷӯшонидашуда ҳал карда, 1 маротибагӣ дар давоми даҳ рӯз барои истеъмол ба бемор диҳед.
Нет комментариев