Cанаи даҳуми ноябри соли ҷорӣ дар шаҳри Конибодом даври шаҳрии озмуни “Маркази таълимӣ — истеҳсолии адрасбофии беҳтарин” гузаронида шуд. Дар озмун намояндагони мақомоти иҷроияи ҳокимияти давлатии шаҳр, раисони ҷамоатҳои деҳот, намояндагони кумитаи иҷроияи ҲХДТ дар шаҳри Конибодом, роҳбарони муассисаҳои таълимӣ, ҳунармандони марказҳои таълимӣ-истеҳсолии ҷамоатҳои деҳот ва муасиссаҳои таълимӣ, инчунин занони ҳунарманди хонашин иштирок доштанд. Адрасбофони ҳамаи ҷамоатҳои деҳот ва муассисаҳои таълимӣ намунаҳои матоъҳои дастибофи худро нишон доданд ва ҳакамон аз рӯи шартҳои озмун ба он баҳогузорӣ намуданд. Ҳангоми баҳогузорӣ асосан ба суръати истеҳсоли матои адрас ва сифати он таваҷҷуҳи аввалиндараҷа зоҳир карда шуд. Дар натиҷа маркази таълимию истеҳсолии “Бунафша” аз ҷамоати деҳоти Лоҳутӣ соҳиби ҷойи аввал шуд. Ҷойи дуюмро муассисаи таҳсилоти миёнаи умумии №32 ва ҷойи сеюмро маркази таълимӣ- истеҳсолии “Ганҷина” соҳиб шуданд. Шоҳҷоиза насиби ҳунарманд — Абдуллоева Дилором аз ҷамоати деҳоти Лоҳутӣ гардид. Дар охир ба ҳамаи иштирокдорон тӯҳфаҳои хотиравӣ супорида шуд.
Манбаъ: сомонаи расмии МИҲД-и вилояти Суғд
Нет комментариев