Сафири Фавқулода ва мухтори Ҷумҳурии Федеративии Олмон дар Ҷумҳурии Тоҷикистон Найнхарт Хёфер – Виссинг дар доираи барномаи сафари кории худ ба шаҳри Хуҷанд дар маросими ифтитоҳи маркази қабули ҳуҷҷатҳо барои раводиди давлати Олмон ва дигар кишварҳои узви минтақаи Шенген иштирок ва суханронӣ намуд.
Тавре, ки иттилоъ дода шуд, маркази хизматрасонии омодасозӣ ва дастраскунии ҳуҷҷатҳо барои гирифтани раводид ба давлати Олмон ва дигар кишварҳои узви минтақаи Шенген: Австрия, Белгия, Дания, Испания, Италия, Латвия, Лаҳистон, Литва, Люксембург, Малта, Маҷористон, Нидерланд, Португалия, Словакия, Словения, Фаронса, Финляндия, Чехия, Шветсия, Эстония ва Юнон аз ҷониби ҶДММ «Дунёгард» амалӣ карда шуда, он дар ошёнаи 3-юми бинои «Казкомерсбонк» дар шаҳри Хуҷанд фаъолият менамояд. Давоми 15 рӯзи корӣ шаҳрвандон метавонанд раводиди худро аз ин марказ дарёбанд. Ширкати «Дунёгард» ба мазмуну муҳтаво ва қабулу раднамоии раводид алоқаманд набуда, танҳо хизматрасонии интиқолдиҳии ҳуҷҷатҳоро амалӣ месозад. Хизматрасонии ширкат барои дастраснамоии раводид ҳудуди 20 арзи евро буда, бе назардошти пардохтпулиҳои Сафорати Олмон дар Тоҷикистон мебошад.
Сафири Фавқулода ва мухтори Ҷумҳурии Федеративии Олмон дар Ҷумҳурии Тоҷикистон Найнхарт Хёфер –Виссинг дар маросими оғози фаъолияти маркази хизматрасонии омодасозӣ ва дастраскунии ҳуҷҷатҳо барои гирифтани раводид ба давлати Олмон ва дигар кишварҳои узви минтақаи Шенген гуфт, ки Ҷумҳурии Федеративии Олмон ҳавасманди ҳарчи содда ва зудтар дастраснамоии раводид ба шаҳрвандони Тоҷикистон аст. Барои сокинони шаҳри Хуҷанд ин марказ имконоти хуберо муҳайё месозад, зеро шаҳрвандон бидуни харҷи иловагӣ ва масрафнамоии вақти зиёд ба раводид соҳиб мешаванд. Гузашта аз ин харҷи роҳкиро низ зимни сафар ба давлати Олмон нисбати дигар минтақаҳо аз шаҳри Хуҷанд арзонтар аст.
Ҷамшед Абдуқаюмзода, муовини Раиси шаҳри Хуҷанд зимни баромади худ таъкид дошт, ки маҳз ба шарофати сиёсати дарҳои кушоди Асосгузори сулҳу Ваҳдати миллӣ, Пешвои миллат, Президенти мамлакат муҳтарам Эмомалӣ Раҳмон шаҳрвандон имкон пайдо менамоянд, ки бидуни мамоният ба дилхоҳ кишвари ҷаҳон сафар намоянд. Тадбири имрӯза, яъне ифтитоҳи маркази хизматрасонии омодасозӣ ва дастраскунии ҳуҷҷатҳо барои гирифтани раводид ба давлати Олмон, ки бахшида ба эълон гардидани соли 2018 «Соли рушди сайёҳӣ ва ҳунарҳои мардумӣ» сурат мегирад, имкон медиҳад, ки мардум бо василаи соддаву осон раводидро дастрас намоянд. Гузашта аз ин барои соҳибкорону тоҷирон баҳри рушди тиҷорат ва дарёфти бозорҳои нави молу коло низ мусоидат хоҳад намуд.
Ҷамшед Абдуқаюмзода, омодагии Мақомоти иҷроияи ҳокимияти давлатии шаҳри Хуҷанд, бахусус Раиси шаҳри Хуҷанд Маъруф Муҳаммадзодаро баҳри рушду тақвияти муносибатҳо баён дошта, ҳавасмандии хешро дар такмили минбаъдаи фаъолияти маркази хизматрасонии омодасозӣ ва дастраскунии ҳуҷҷатҳо барои гирифтани раводид ба давлати Олмон изҳор намуд.
Роҳбари маркази хизматрасонии омодасозӣ ва дастраскунии ҳуҷҷатҳо барои гирифтани раводид ба давлати Олмон Наргис Иброҳимова миннатдории хешро ба Мақомоти иҷроияи ҳокимияти давлатии шаҳри Хуҷанд ва СафоратиҶумҳурии Федеративии Олмон дар Ҷумҳурии Тоҷикистон ҷиҳати ифтитоҳи маркази хизматрасонӣ изҳор дошта, таъкид намуд, ки ба боварии онҳо сазовор гардида, ба ҳар як мизоҷ самимона муносибат ва маслиҳатҳои муфид хоҳанд дод.
Манбаъ: Дафтари матбуоти Раиси шаҳри Хуҷанд
Нет комментариев