Миёни шаҳри Қӯрғонтеппаи вилояти Хатлон ва яке аз шаҳрҳои Япония муносибатҳои бародаршаҳрӣ роҳандозӣ карда мешаванд. Ин матлаб 25 декабр зимни мулоқоти раиси вилояти Хатлон Давлатшоҳ Гулмаҳмадзода бо муовини Сафири Ҷумҳурии Япония дар Ҷумҳурии Тоҷикистон Тотомоҳиро Накагакӣ пешниҳод гардид. Дар мулоқоти мазкур раиси шаҳри Қӯрғонтеппа Абдуалим Исмоилзода низ иштирок дошт. Раиси вилояти Хатлон барои дастгириҳои доимӣ ва амалишавии лоиҳаҳо дар шаҳру ноҳияҳои вилоят аз ҷониби Сафорати Япония, Агентии JICA ва Ҳукумати Япония, аз ҷумла, лоиҳаҳои грантӣ дар соҳаҳои гуногуни вилоят, бахусус роҳсозӣ, тандурустию маориф ба Сафорати Япония дар Ҷумҳурии Тоҷикистон изҳори миннатдорӣ намуд. Мавсуф ҳамзамон барои баррасии минбаъда якчанд масъалаҳоро, ба монанди таъминоти аҳолӣ бо оби нӯшокӣ, беҳдошти замин, таҷҳизонидани беморхонаи сохташавандаи бемориҳои сироятии ноҳияи Данғара ва дигар муассисаҳои тандурустӣ, инчунин Театри мусиқӣ-мазҳакавии ба номи Ато Муҳаммадҷонови шаҳри Қӯрғонтеппаро бо таҷҳизоти замонавӣ пешниҳод намуд. Тотомоҳиро Накагакӣ иброз дошт, ки сафорат масъалаҳои мазкурро мавриди баррасӣ қарор дода, тариқи лоиҳаҳо амалишавии онҳоро дастгирӣ менамояд.
Манбаъ: сомонаи расмии АМИТ «Ховар»
Нет комментариев