Olá amigos. Чун ҳамеша оғоз менамоем аз пешниҳоди хабарҳои нав.
Инак шурӯъ мекунем аз натиҷаи бозии теннис. Екатерина Макарова ва Елена Веснина ҳар ду аз Русия дар намуди бозии ҷуфтӣ медали тилло бурд намуданд. Онҳо Тимеа Бачински ва Мартины Хингисро мағлуб карданд. Ҳамзамон, дар мусобиқаи теннис варзишгарзанони Амрикоӣ Бетани Маттек-Сэндз ва Джек Сок ғалаба ба даст оварданд. Дар бозии ниҳоӣ байни мардон Энди Маррэй аз Британия Хуана Мартинаро бурд намуд.
Дар муҳорибаи римӣ-юнонӣ дар вазни то 75 кг Роман Власов аз Русия соҳиби медали тилло гардид. Дар вазни то 59кг медали биринҷӣ насиби Элмурод Тошмуродов аз Ӯзбекистон ва медали тилло насиби Исмаэл Борреро аз Куба шуд.
Дар гимнастикаи варзишӣ медали тиллоро Алия Мустафина аз Русия бурд кард. Дар намуди ҷаҳидан байни занон мақоми аввал насиби Симон Байлз аз ИМА ва мақоми дуюм насиби Мария Пасека аз Русия шуд.
Дар намуди бокс дар вазни то 49 кг варзишгар аз Ӯзбекистон Ҳасанбой Дӯстматов ғолиб баромад.
Дар дучархаронӣ Денис Дмитриев аз Русия медали биринҷиро ба даст овард. Медали тилло насиби Джейсон Кенни аз Британияи Кабир гардид.
Хитой боз як медали тиллоро дар намуди варзиши сабук дар вазни то 75 кг бурд намуд. Гирандаи он варзишгарзан Мэн Сюпин мебошад.
Намояндаи Африқои Ҷанубӣ Уэйд ван Никерк дар мусобиқаи давидан ба масофаи 400 метр ғалаба ба даст овард. Варзишгари 24-сола аз дастоварди варзишгари маъруф Майкл Джонсон, ки давоми 17 сол касе ба ӯ баробар шуда натавонист, гузашта, рекорди нави ҷаҳониро гузошт.
Варзишгари Хитоӣ Цин Кай дасту дили худро ба дӯстдоштаи хеш Хэ Цзи якбора пас аз маросими мукофотсупорӣ ба ҷоизадорони Бозиҳои олимпии соли 2016 фидо намуд. Варзишгарзан дар Рио-2016 медали нуқра ба даст овард. Цин Кай низ дар навбати худ узви дастаи мунтахаби давлати Хитой маҳсуб мешавад, ӯ низ медал бурд кард, вале медали биринҷӣ.
Суди ҳакамии варзишӣ (CAS), эҳтимол аст қарорро оид ба шикояти варзишгарзани Русия Даря Клишина қабул намояд. Клишина чанде қабл дар варзиши сабук ягона зане дониста шуд, ки то бозиҳои олимпӣ роҳ дода шуда буд.
Шиновари Амрико Райан Лохте ва боз се аъзои дастаи мунтахаби ИМА оид ба шиноварӣ Гуннар Бенц, Джек Конгер ва Джимми Фелген ҳангоми Бозиҳои олимпӣ дар Рио-де-Жанейро мавриди ғорати ашхоси номаълум қарор гирифтанд.
Имрӯз дар Бозиҳои тобистонаи олимпӣ баромади боз як варзишгари Тоҷикистон Кристина Пронженко ба нақша гирифта шудааст. Ӯ дар намуди давидан бо чемпионкаи секаратаи олимпӣ Вероника Кэмпбелл-Браун қувваозмоӣ хоҳад кард.
Имрӯз дар Бозиҳои олимпӣ 17 маҷмӯи медалҳо бурд карда мешаванд. 4 маҷмӯи медал дар варзиши сабук, 3 маҷмӯъ дар гимнастикаи варзишӣ, 2 маҷмӯи медал дар намуди заврақронӣ ва муҳорибаи римию юнонӣ, 1 маҷмӯъ дар бокс, дучархаронӣ, аспдавонӣ, шиноварӣ, ҷаҳидан ба об ва вазнбардорӣ.
Пас аз рӯзи нуҳуми бозиҳо бо 26 медали тилло дар мақоми якум ИМА, дар мақомҳои дуюму сеюм Хитой ва Британияи Кабир бо 15 медали тилло ва дар ҷойи чорум бо 9 медали тилло Русия қарор доранд.
Тамошо кардани Олимпиадаро давом медиҳем.
Хайр, то вохӯрии минбаъда!
Нет комментариев