Дар роҳҳои автомобилгарди ҳудуди вилоят коста шудани вазъи интизоми нақлиётӣ ва афзудани ҳодисаҳои роҳу нақлиётӣ бо оқибатҳои вазнин, боиси нигаронии роҳбарияти Раёсати ВКД Ҷумҳурии Тоҷикистон дар вилояти Суғд ва ҷомеа гардидааст.
Бар асари рух додани ду ҳодисаҳои роҳу нақлиётӣ дар ҳудуди шаҳрҳои Истаравшан ва Конибодом 3 нафар ба ҳалокат расида, 3 тани дигар ҷароҳатҳои ҳархелаи ҷисмонӣ бардоштанд.
Санаи 7-уми январи соли ҷорӣ, тахминан соати 19:00, ронандаи автомашинаи тамғаи «Опель-Зафира», бе аломати қайди давлатӣ Тоҳирҷон Саидов, соли таваллудаш 1968, сокини шаҳри Хуҷанд, ҳангоми ҳаракат аз самти шаҳри Истаравшан ба шаҳри Хуҷанд, дар километри 241-уми роҳи нақлиётгарди «Душанбе-Хуҷанд-Чаноқ», ҳудуди ҷамоати Зарҳалоли ноҳияи Истаравшан, аз ўҳдаи идора намудани воситаи нақлиёт набаромада, бо қисми пеши автомашина ба монеаи дарвозаи даромадгоҳи шаҳри Истаравшан бархўрд.
Дар натиҷа мусофири автомашина: Раҳматулло Саидов, соли таваллудаш 1967, истиқоматкунандаи шаҳри Душанбе ҷароҳати ҷисмонӣ бардошта, дар беморхонаи марказии шаҳри Истаравшан ба ҳалокат расид.
Худи ронанда – Тоҳирҷон Саидов ва мусофирони дигар Зоҳир Саидов, соли таваллудаш 1971, сокини шаҳри Кўлоб ва ноболиғ Муҳаммадҷон Саидов, соли таваллудаш 2002, хонандаи синфи 6-уми МТМУ №19-и шаҳри Хуҷанд ҷароҳатҳои гуногуни ҷисмонӣ бардошта, ба беморхонаи марказии шаҳри Истаравшан бистарӣ карда шуданд.
Ё худ 13-уми январ, тахминан соати 14:30, ронандаи воситаи нақлиёти тамғаи «Опель-Вектра», рақами давлатиаш 5725 АД 02, Низомҷон Хоҷамбердиев, соли таваллудаш 1997, сокини ҷамоати деҳоти Патари ноҳияи Конибодом, зимни ҳаракат дар километри 53,5-уми роҳи нақлиётгарди «Деҳмой-Конибодом», ҳудуди ҷамоати Патар, дар рў ба руйи чойхонаи «Шифо», ба суръатафзоӣ роҳ дода, аз ўҳдаи идора намудани автомашина набаромад ва пиёдагардон Холмурод Ҷўраев, соли таваллудаш 2005, хонандаи синфи 4-уми МТМУ №44-и шаҳри Конибодом ва Барнохон Шарипова, соли таваллудаш 1976, ки истиқоматкунандагони ҷамоати Патари ноҳияи Конибодом мебошанд ва дар канори рости роҳ қарор доштанд, пахш намуд.
Бар асари ин садама ҳардуи пиёдагардон ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расиданд.
Алҳол аз рў ин садамаҳои нақлиётии оқибаташон вазнин маводҳои зарурӣ тартиб дода шуда, аз ҷониби шўъбачаҳои тафтишотии Шўъбаҳои Вазорат дар шаҳрҳои Истаравшан ва Конибодом тафтишоти пешакӣ гузаронида шуда истодааст.
Ронандагони воситаҳои нақлиётро зарур аст, ки бо андешаи таъмини бехатарии ҳаракат дар роҳ ва ба эътидол овардани вазъи интизоми нақлиётӣ, дар сари чамабараки нақлиёт бодиққату эҳтиёткор бошанд ва нагузоранд, ки риштаи ҳаёти иштирокчиёни ҳаракат дар роҳ ба таври фоҷиабор ва бармаҳал канда шавад.
Дар ин бора аз БДА РВКД дар вилояти Суғд хабар доданд.
Нет комментариев