Самири 9-сола то ба имрӯз дар 25 консерти саросари дунё ҳунарнамоӣ кардааст.
Самир Абдураззоқов, писари пианинонавози маъруф Нисор Абдураззоқовро ба Фестивали байнулмилалӣ дар Амстердам даъват карданд.
Самир Абдураззоқов рӯзи 2 июли соли равон дар Озмуни 3-юми байнулмилалии «Feurich International piano competition» зинаи 1-умро ишғол намуд. Озмун дар шаҳри Вена бо иштироки намояндагони синнусоли гуногуни 22 давлати дунё доир гардида, Самир Тоҷикистонро намояндагӣ кард.
Пас аз ҳунарнамоии муваффақона Самир якбора ба чанд консерт ва чорабиниҳои бузурги байнулмилалӣ даъват шуд:
— 2 августи соли 2018 — ба вохӯрӣ бо омӯзгорони маъруфи мусиқӣ ва фортепиано дар мактаби тобистонаи Комо (Италия);
— 16 сентябри соли 2018 — ба гала-консерти пиано «Antoni Parera Fons Vaduz Classic Festival»;
— 15 ноябри соли 2018 — Ба Озмуни байналмилалии мусиқии «Истеъдодҳои ҷавон» (Флорда Кис);
— 10 феврали соли 2019 — ба фестивал дар Гамбург. Агар Самир зинаи 1-умро ишғол намояд, пас дар «Нью-Йорк Карнеги-Холл» ҳунарнамоӣ хоҳад кард.
Бори нахуст пианинонавози наврас 5 марти соли 2015 дар 6-солагиаш дар Гётеборг ҳунарнамоӣ кард. Самир ҳамроҳи падар ва ҳамзамон омӯзгораш Нисор Абдураззоқов асари Мотсарт «Twinkle twinkle little star» иҷро карданд. То имрӯз Самир аллакай дар 25 консертҳо дар саросари дунё ширкат варзидааст.
«Ба дар оянда мусиқинавози маъруф шудани Самир натанҳо ман, балки Толибхон Шаҳидӣ ва писарони ӯ — Табриз, Фирдавс ва Ҳофиз Шаҳидӣ низ бовар доранд. Онҳо ҳамаи маблағи сафари ӯ ба консертҳоро пардохт намуданд. Аз моҳи марти соли ҷорӣ фонди дастгирии мусиқачиёни ҷавони «Shakhidi & Sons» ба Самир стипендия пардохт мекунад», — қайд кард Нисор Абдураззоқов.
Қобили зикр аст, ки айни замон Самир ба омӯзиши асарҳои оҳангсозони тоҷик Толибхон ва Зиёдулло Шаҳидӣ машғул аст.
Нет комментариев