Тибқи нақшаи чорабиниҳои Мақомоти иҷроияи ҳокимияти давлатии шаҳри Хуҷанд бахшида ба 30 солагии Истиқлолияти давлатии Ҷумҳурии Тоҷикистон бо мақсади беҳдошти фазои экологӣ ва ба роҳ мондани корҳои ободонӣ шанбегӣ гузаронида шуд, ки дар он зиёда аз 10 ҳазор хонандагон, донишҷӯён ва омӯзгорони муассисаҳои таълимӣ иштирок намуданд.
Дар натиҷа аз ҷониби иштирокчиёни ин ҳашари умумишаҳрӣ як қатор корҳои тозагиву ободонӣ гузаронида шуда, инчнуин дар майдону гулгаштҳо корҳои нармкунии замин ва сабзкорӣ низ ба анҷом расонида шуд.
Воқеан ҳам имрӯзҳо дар қаламрави шаҳр баҳри истиқболи сазовори 30-солагии Истиқлолияти давлатии Ҷумҳурии Тоҷикистон корҳои созандагию бунёдкорӣ ва ободонӣ вусъати тоза мегирад. Он дар асоси Фармони Президенти Ҷумҳурии Тоҷикистон «Дар бораи ҷашни 30-солагии Истиқлолияти давлатии Ҷумҳурии Тоҷикистон», қарори Раиси вилояти Суғд «Дар бораи вусъат бахшидан ба корҳои созандагию бунёдкорӣ, ободию кабудизоркунии маҳали зист ва сазовор истиқбол гирифтани ҷашни 30-солагии Истиқлолияти Ҷумҳурии Тоҷикистон» ва қарори Раиси шаҳри Хуҷанд «Дар бораи эълон намудани 1300 рӯзи ободонию созандагӣ ба истиқболи 30-солагии Истиқлолияти давлатии Ҷумҳурии Тоҷикистон» роҳандозӣ гаштааст. Баробари ба тасвиб расидани фармону қарорҳои дар боло зикршуда, тамоми ташкилоту муассисаҳои шаҳри бостонии Хуҷанд нақша –чорабиниҳо тартиб доданд ва фаъолияти худро дар асоси он ба роҳ монданд.
Бояд зикр кард, ки ҳадафи ҳашар- тақвияти ҳисси ватандӯстиву худшиносӣ, ифтихори ватандорӣ ва тарбияи чавонон дар рӯҳияи инсондӯстиву якдилӣ ва таҳкими сулҳу ваҳдати миллӣ мебошад. Ин иқдом идомаи анъанаҳои наҷиби ниёгонамон бобати беҳдошти муҳити зист мебошад, зеро тоза нигоҳ доштани атроф, пайравӣ ва саҳмгузорӣ дар амали хайр ва пос доштани анъанаҳои наҷиби гузаштагонамон аст.
Ин ҳама ободонӣ имкон медиҳад, ки барои шаҳрвандон зиндагии обод, тозаву осуда таъмин ва шаҳри Хуҷанд ба «Тирози ҷаҳон»-и воқеъӣ мубаддал гардад.
Манбаъ: Дафтари матбуоти Раиси шаҳри Хуҷанд
Нет комментариев