Соли 2014 ба Тоҷикистон ба маблағи 508 млн. доллари ИМА ҳудуди 580 ҳазор тонна маҳсулоти нафтӣ ворид шуд. Муовини сардори Хадамоти гумруки назди ҳукумати ҶТ Нуриддин Маҳмадов зимни нишасти хабарӣ дар ин робита изҳор намуд, ки дар ин давра ба ҷумҳурӣ беш аз 246 ҳазор тонна бензин, ҳудуди 245 ҳазор тонна сӯзишвории дизелӣ, 60,5 ҳазор тонна сӯзишвории реактивӣ, наздики 16 ҳазор тонна мазут ва дигар маҳсулоти нафтӣ интиқол дода шудааст.Маҳмадов таъкид дошт, ки дар муқоиса бо соли 2013 дар соли 2014 ҳаҷми воридоти маҳсулоти нафтӣ ба Тоҷикистон аз рӯи ҳаҷм 218 ҳазор тонна ва аз рӯи арзиш 219 млн. доллари ИМА афзудааст. Зимнан зикр гардид, ки маҳсулоти нафтӣ ба Тоҷикистон асосан аз Русия ворид карда мешавад, ки ба ҳиссаи ин кишвар қариб 90% аз ҳаҷми умумии маводи сӯхти воридшуда рост меояд. Ҳамчунин соли гузашта ба Тоҷикистон аз Қазоқистон (8,4%), Туркманистон (2,8%) ва дигар кишварҳо низ маҳсулоти нафтӣ интиқол дода шудааст. Дар ин бора news.tj хабар медиҳад.