Таҷлили Рӯзи шаҳри Хуҷанд…

0
2 405 просмотров

Дар асоси нақшаи чорабинӣ ва бо даъвати Мақомоти иҷроияи ҳокимияти давлатии шаҳри Хуҷанд дастаи Медиапортали «Тироз» бо ҳадафи инъикоси фаврии тантанаҳои таҷлили бошукӯҳи Рӯзи шаҳри Хуҷанд дар идгоҳи асосӣ — Маҷмааи таърихии фарҳангии «Истиқлол» қарор дорад. Ин маҷмааъ чанде қабл бо иштироки Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон ба истифода дода шуда буд ва тӯҳфаи хубу арзандае шуд барои сокинон ва меҳмонони шаҳр дар рӯзҳои таҷлили 25-умин солгарди Истиқлолияти давлатии Ҷумҳурии Тоҷикистон.

Бояд гуфт, ки имсол маротибаи дуюм аст, ки шаҳрвандон ва меҳмонони Хуҷанди бостону ҳамешаҷавон Рӯзи шаҳри Хуҷандро ҷашн мегиранд. Зеро, ҳанӯз 24-уми сентябри соли 2014 Маҷлиси вакилони халқи шаҳр нишони шаҳрро тасдиқ намуда, 25-уми сентябрро ҳамчун Рӯзи шаҳри Хуҷанд эълон намуда буд.

khujand-00-5-_novyiy-razmer

Идгоҳ ба назар хеле зебо ва назаррабо мерасад ва оҳиста-оҳиста сокинон ва меҳмонон барои тамошои барномаи музайяни фарҳангию фароғатӣ ҷамъ мешаванд.

Интизорӣ меравад, ки дар ин чорабинӣ меҳмонон аз тамоми манотиқи кишвар ва бародаршаҳрҳои Хуҷанд иштирок намоянд.

Чанд нафар аз Шаҳрвандони фахрии Хуҷанд, бахусус устодон Усмонҷон Ғаффоров, Баҳриддин Ахмедов, Шуҷоат Ҳасанова ва дигарон аз аввалинҳо шуда ба идгоҳ омаданд.

Дар қабати аввали Маҷмааи фарҳангию фароғатии «Истиқлол» намоиши дастовардҳои наҷиби корхонаҳои саноатию хӯрокворӣ ва аҳли маориф-устодону хонандагони макотиби шаҳри Хуҷанд ба тамошои меҳмонон гузошта шуданд. Мусаллам гардид, ки саноатчиён ва маорифчиёни Хуҷанд ҷашни бузургу таърихии кишвар — 25-умин солгарди Истиқлолияти давлатии Ҷумҳурии Тоҷикистонро бо нишондиҳандаҳои хуби меҳнатӣ ва дастовардҳои назаррас истиқбол намуданд.

Раиси шаҳри Хуҷанд Шариф Шарифзода ва меҳмонони ҷашнвора, бахусус намояндагони чанде аз бародаршаҳрҳои Хуҷанд аз намоиши дастовардҳои саноатчиён ва аҳли маорифи маркази вилоят дидан намуда, барои чунин комёбиву нишондиҳандаҳои хуби меҳнатӣ баҳои баланд доданд.

Сипас ба саҳнаи идона орододашуда Раиси шаҳри Хуҷанд Шариф Шарифзода ва меҳмонон баромаданд. Чорабиниро Раиси шаҳр бо сухани ифтитоҳӣ оғоз намуда, ҷамъомадагон ва дар симои онҳо кулли мардуми шаҳри Хуҷандро бо Рӯзи шаҳри Хуҷанд самимона табрик намуд.

Намояндаи консулгарии Ҷумҳурии Қазоқистон дар Тоҷикистон А.Б.Бекбасимов сокинон ва меҳмононро муборакбод гуфта, ҳамкории тарафайн ва робитаи ду давлат – Тоҷикистон ва Қазоқистонро ёдовар шуд.

Муовини Раиси шаҳри Оши Ҷумҳурии Қирғизистон Нурбек Қодиров табрикоти роҳбарият ва шаҳрвандони шаҳри Ошро ба ҷамъомадагон расонда, барояшон сиҳатмандии комил ва сарбаландӣ таманно намуд. Ӯ доир ба ҳамкории бародаршаҳрҳои Хуҷанд ва Ош ва дӯстиву рафоқати шаҳрвандони ин ду минтақаи бостон сухан кард.

Шоири халқии Тоҷикистон Аскар Ҳаким оид ба ободкориву созандагӣ дар шаҳри Хуҷанд дар солҳои соҳибистиқлолии Ватан сохта, ба истифода дода шудани ҳазорҳо иншооти иқтисодию иҷтимоӣ сухан карда, зикр намуд, ки воқеан Хуҷанд ба биҳишти рӯи замин мубаддал гардидааст. Дар фарҷоми сухан шеъри навэҷодкардаи хешро бо номи “Ватан” ба самъи ҳозирин расонд.

khujand-03-61-_novyiy-razmer

Ба ифтихори Рӯзи шаҳри Хуҷанд 5 нафар шахсони арзандаву наҷиби маркази вилоят унвони “Шаҳрванди фахрии Хуҷанд”-ро соҳиб гардиданд.

khujand-04-20-_novyiy-razmer

Ҳамзамон, бо ҳадафи дастгирии бонувони ҳунарманд 15 нафар занони меҳнатдӯсту заҳматнописанд дар намуди ҳунарҳои адрасбофӣ, қолинбофӣ, сӯзанидӯзӣ, қуроқдӯзӣ, кешбофӣ соҳиби грантҳои Раиси шаҳри Хуҷанд ба маблағи умумии 50 ҳазор сомонӣ шуданд. Дар вазъияти тантанавӣ ба онҳо грантҳои Раиси шаҳр супорида шуданд.

khujand-04-5-_novyiy-razmer

Дар қисми дуюм-қисми фарҳангии чорабинӣ нахуст барномаи театрикунонидшуда, ки ифодагари таърихи беш аз 2500 солаи Хуҷанд, бузургони давру замон, адибону олимон ва намояндагони соҳаҳои мухталифи хоҷагии халқ буд, пешниҳоди тамошобинон гардид.

Суруду таронаҳои аҳли санъат, ки тараннумгари сулҳу ваҳдат, ободиву шукуфоӣ, оромиву осоиштагии Ватан, бахусус шаҳри Хуҷанди бостону офтобрӯя буданд, тақдими тамошобинон гардонида шуданд. Ба ҷамъомадагон аз ҷумла, суруди Ҳунарпешаи шоистаи Тоҷикистон Каромат Ҳоҷиева бо номи “Хуҷандам” хеле писанд омад, ки онҳо бо кафкӯбиҳои бардавом истиқбол намуданд.

Рақсҳои зебову мавзуне, ки баромади сарояндагонро боз ҳам назаррабо мекарданд, мақбули ҳозирин шуданд.

Сарояндагони сурудҳои эстрадӣ Дилноза Каримова, Шерози Камол, дуэти Озода Аҳадова ва Олимҷон Воҳидов, Дамирбек Олимов, дуэти Гуласал Пӯлодова ва Аъзам Болтубоев, Шарифҷон Абдуллоев, Мадинаи Моҳрӯ, Олимҷон Маҳмудов бо суруду таронаҳои рӯҳнавозу дилнишин табъи бинандагонро болида намуданд.

koncert-04-21-_novyiy-razmer

Дар фарҷоми барнома Ҳунарманди халқии Иттиҳоди Шӯравӣ устод Ҷӯрабек Муродов бори дигар бо санъати волову нотакрор ва бо пораҳо аз сурудҳои бо забонҳои мухталифи халқу миллатҳои ҷаҳон, бахусус, русӣ, қазоқӣ, қирғизӣ, ӯзбекӣ, ҷопонӣ, итолиёвӣ ва ғайра қалби ҷамъомадагонро тасхир карда, дар ниҳоят онҳоро бо суруди тоҷикӣ мафтун намуд.

Ансамблҳои рақсии “Гулноз”, “Парниён”, “Таманно”, “Садбарг” ба барномаи консертӣ шукӯҳу ҷилои тоза бахшиданд.

Ҳамин тавр, таҷлили Рӯзи шаҳри Хуҷанд бо иштироки наздик 15 ҳазор нафар тамошобинон дар назди Маҷмааи навбунёди таърихии фарҳангии “Истиқлол” дар сатҳи хуби ташкилӣ ва бошукӯҳу хотирмон сурат гирифт.

koncert-04-16-_novyiy-razmer

 

 

 

Если вы нашли ошибку, пожалуйста, выделите фрагмент текста и нажмите Ctrl+Enter.

Нет комментариев

Также рекомендуем

Сообщить об опечатке

Текст, который будет отправлен нашим редакторам: