Журналистикаи чандрасонаӣ — мултимедиа чист? Ин системаи иттилоотӣ мебошад, ки маълумотро дар шаклҳои гуногун, яъне садоӣ, графикаи аниматсионии компютерӣ ва видеоӣ пешниҳод мекунад. Масалан, маводе, ки дар сомона ҷойгир карда мешавад, бояд дорои матн, аудио, графика ва видеомаълумот бошад, ҳамчунин метавон аз усули интерактивӣ истифода бурд.
Давоми ду рӯз мушовир оид ба бизнес, роҳбари оҷонсии мултимедиа ва E.event Олга Каплина ва Фарҳод Раҳматов роҳбари Ташкилоти интернюс дар Тоҷикистон барои кормандони ВАО-и хусусӣ тренинг доир намуданд.
Тренинг дар ШТРР-и “Тироз”баргузор гардида, дар он хабарнигорони радиои «Тироз» ШТР “СМ-1” ва “АЗИЯ” иштирок намуданд.
Farhod_Rahmatov from Portal Tiroz on Vimeo.
Фарҳод Раҳматов-роҳбари Ташкилоти интернюс дар Тоҷикистон, ҳадафи баргузор намудани тренингро чунин тавзеҳ дод: “Тавре мебинем, дар давоми ду соли охир, интернет ва техникаи муосир, ба зиндагии инсоният тагйироти ҷиддӣ ворид намудааст. Имрӯз инсони пешрафта, мехоҳад маводи иттилоотиро дар жанрҳои гуногун дастрас кунад. Ин хабарнигоронро водор мекунад, ки дар баробари пахши барномаҳои радио-телевизионӣ, ҳамчунин онро дар сомонаҳо ҷойгир кунанд, ки ин мултимедиа-журналистикаи чандрасонаӣ унвон гирифтааст. Ин усули иттилоърасонӣ дар аксарияти кишварҳои пешрафтаи ҷаҳон ба роҳ монда шудааст. Мо мехоҳем, ки хабарнигорони тоҷик низ аз дигар ҳамкасбони хориҷиашон қафо намонанд. Бо ин мақсад, роҳҳои муосири ҷойгир кардани маводро тариқи интернет ба онҳо хостем омӯзонем ”
Мусаллам аст, ки имрӯз бо баробари пешравии техника ва технологияи инноватсионӣ, бахусус, пайдоиши интернет, аксарияти телевизион ва радио дар Тоҷикистон ба мултимедиа рӯй оварданд. Дар баробари пахш намудани барномаи телевизиониву радиоӣ, маводи иттилоотиро барои истифодабарандагони интернет дастрас менамоянд. Дар ҷараёни баргузории тренинг, мутахассисони соҳаи мултимедиа тарзи дурусти ҷойгиркунонии мавод ва дигар нозукиҳои шакли муосири иттилоърасониро ба иштирокчиён омӯзониданд. Иштирокчиён ба гурӯҳҳо ҷудо шуда, бо истифода аз усулҳои нав мавод омода ва онро муаррифӣ намуданд.
Ҳалимҷон Ҷӯраев, 7-сол мешавад, ки дар телевизиони “СМ-1” ба ҳайси ровӣ-хабарнигор фаъолият мебарад. Ҳалимҷон мегӯяд: “Гарчанде аз мавҷудияти мултимедиа, яъне журналистикаи чандрасонаӣ бохабар будам, вале дар бораи усулҳои муосири ҷойгиркунонии маводи иттилоотӣ дар сомона тасаввуроте надоштам. Имрӯз шунавандаю бинанда хеле кунҷкоб гаштааст, мехоҳад иттилоотро ҳам бинад, шунавад ва инчунин матни электронии онро дастрас кунад. Тавре маълум гашт, матни иттилоотӣ бояд аксҳо, видео ва аудио дошта бошад, ки ин хеле ҷолиб аст. Тренинг нигоҳи маро пурра дигар кард ва аз ин пас кӯшиш мекунам, ки дониши пайдо кардаамро дар амал татбиқ намоям. ”
Halimjon_Juraev from Portal Tiroz on Vimeo.
Боиси қайд аст, ки радиои “Тироз” ҳанӯз соли 2014 ба усули нави иттилоърасонӣ-мултимедиа шурӯъ намудааст. Кунун шунавандагон имконият доранд, ки тавассути интернет барномаҳоро аз медиапортали “Тироз” гӯш карда, дар бахшҳои мухталиф, аз қабили “Хабарҳо”, “Симои ҳаёт” (Life style), “Маслиҳатҳо”, “Дурахши ситораҳо” ва ғайра маводи ҷолибу диққатҷалбкунандаро мутолиа намоянд.
Дар ҷамъбасти тренинг, маводи омоданамудаи журналистон муҳокима ва мавриди таҳлил қарор гирифта, аз ҷониби медиамутахассисон баҳогузорӣ карда шуданд. Баъдан иштирокчиён бо истифода аз интернет ва усулҳои муосири компютерӣ онро дар расонаҳои маъмули Осиёи Марказӣ ҷойгир намуданд.
Нет комментариев