Сомон Маҳмадбеков, паҳлавони тоҷик, дар Ҷоми Аврупои дзюдочиён миёни навҷавонони то 21 сола, ки дар шаҳри Аради Руминия баргузор гардид, медали тилло ба даст овард. Ӯ, ки дар рақобатҳо дар вазни зери 66 кило дар даври аввал озод буд, пас аз ду пирӯзӣ бар Константин Ноткин (Украина) ва Александр Габлер (Олмон) дар даври ниманиҳоӣ Каро Марандиянро аз Украина шикаст дод. Сомон дар қувваозмоии ниҳоӣ бар Олег Овчаренко (Украина) пирӯз шуд ва соҳиби нишони тилло шуд. Дар ин мусобиқа 248 варзишгар (156 ҷавон ва 92 духтар) аз 33 кишвар иштирок доранд. Сомон Маҳмадбеков дар феҳрасти Федератсияи байналмилалии ҷудо (IJF) дар вазни зери 66 кило дар байни 260 навҷавоне, ки ба ин рӯйхат шомил шудаанд, бо 24 имтиёз мақоми 85-умро касб кардааст. Ҳамакнун ӯ баъди пирӯзӣ дар Ҷоми Аврупо дар ин феҳраст боло хоҳад рафт. Ёдовар мешавем, Сомон Маҳмадбеков дар Ҷоми Африқо оид ба ҷудо миёни наврасон, ки рӯзҳои 22-23 апрели соли равон дар Тунис баргузор шуд, медали тилло ба даст овард. Ӯ дар рақобатҳо дар вазни зери 66 кило бар рақибонаш аз Алҷазоир, Беларус ва Тунис ғалаба кард. Сомон Маҳмадбеков, варзишгари тоҷики муқими Русия, феълан дар шаҳри Иркутск таҳти раҳбарии мураббиёнаш Эргаш ва Фотеҳ Маҳмадбековҳо тамрин менамояд. Ӯ дар мусобиқоти байналмилалӣ Тоҷикистонро намояндагӣ мекунад. Ба шарофати пирӯзии Сомон дар Ҷоми Аврупо дар Руминия ва дар Ҷоми Африқо дар Тунис парчами давлатии Тоҷикистон барафрохта, суруди миллии кишвар танинандоз шуд.
Манбаъ: Сомонаи расмии телевизиони “Варзиштв”
Нет комментариев