Раиси вилояти Суғд Абдураҳмон Қодирӣ Сафири Фавқулодда ва Мухтори Федератсияи Русия дар Ҷумҳурии Тоҷикистон Игор Лякин — Флоровро ба ҳузур пазируфт.
Зимни сӯҳбат ҷонибҳо аз ҳамкориҳои мутақобилаи кишварҳо изҳори қаноатмандӣ намуда, густариши равобити тиҷоратиро ба манфитаи кор арзёбӣ намуданд. Раиси вилоят таъкид намуд, ки Тоҷикистон бо Федератсияи Русия муносибати дӯстона ва самимӣ дошта, Русияро шарики стратегии худ мешуморад. Дар ин раванд вилояти Суғд бо як қатор минтақаҳои Федератсияи Русия равобити густурдаро дар бахшҳои гуногун ба роҳ мондааст.
Игор Лякин — Флоров изҳор намуд, ки вилояти Суғд баҳри расидан ба ҳадафҳои бузурги иқтисодиву иҷтимоӣ қадамҳои устувор мегузорад. Бо қаноатмандӣ таъкид гардид, ки дар вилояти Суғд рушди босуботи иқтисодӣ таъмин гашта, вилоят мунтазам пеш меравад ва мутобиқ ба талаботи замони муосир ривоҷу равнақи ҳамаи самтҳои хоҷагии халқ дар сатҳи зарурӣ ба роҳ монда шудааст.
Игор Лякин — Флоров ҳавасмандии соҳибкорон ва ташкилоту муассисаҳои бузурги Русияро дар содироту воридоти молу маҳсулот, аз ҷумла меваю сабзавот, сохтмони иншооти гуногун баён намуд.
Раиси вилояти Суғд зикр дошт, ки барои бамаротиб зиёд кардани содироти меваю сабзавот аз Суғд ба минтақаҳои Русия бояд аз қувваи соҳибкорони вилоят васеъ истифода бурд, зеро онҳо дар ин самт солҳои тӯлонӣ кору фаъолият дошта, талаботи ду кишварро ба хубӣ медонанд ва онро риоя менамоянд. Ин пешниҳоди Абдураҳмон Қодирӣ аз ҷониби дипломати рус бо қаноатмандӣ қабул шуд.
Ҳамчунин дар мулоқоти зикр ёфт, ки аксари мухоҷирони меҳнатии Тоҷикистон дар Русия қарор дошта, ҷониби Тоҷикистон, аз ҷумла вилояти Суғд баҳри коҳиш додани ин раванд дар самтҳои гуногун аз қабили таҷдиди хоҷагиҳои калонҳаҷми кишоварзӣ ва соҳиби ҳақиқии замин намудани деҳқон, эҳёи ҳунарҳои мардумӣ ва таъсиси марказҳои ҳунаромузӣ ва ба ин васила соҳибкасб намудани бонувон, бунёди шаҳри нав бо номи Сайҳун ва боғи интенсивӣ дар дашти Сомғор фаъолияти густурдаро ба роҳ мондааст. Маҳз амалишавии чунин тадбирҳост, ки давоми соли гузашта 44 ҳазор ва дар семоҳаи авали соли ҷорӣ наздик 10 ҳазор нафар шумораи муҳоҷирони меҳнатӣ кам карда шудааст. Ҷонибҳо ҳамчунин густариши ҳамкориҳоро дар соҳаҳои маориф, фарҳанг ва туризм мавриди баррасӣ қарор доданд.
Дар ин бора sugd.tj хабар медиҳад.
Нет комментариев