Ба муносибати 79-солагии Рӯзи Ғалаба дар Ҷанги Бузурги Ватанӣ ба иштирокчиён ва маъюбони ин ҷанг кӯмакҳои пулӣ дода мешавад. Дар ин бора қарори дахлдори Раиси вилояти Суғд Раҷаббой Аҳмадзода ба имзо расид.
Соли равон ба иштирокчиёну маъюбони ҶБВ, ҳамсарони бесаробонмондаи ҷанговарони ҳалокгардидае, ки нафақаи бесаробонӣ мегиранд, ба ҳар кадоме ба миқдори 7 ҳазор сомонӣ кӯмакпулӣ дода мешавад.
Ҳамзамон, ба шахсоне, ки дар солҳои ҶБВ дар хизмати ҳарбӣ буданд ва камаш шаш моҳ дар ақибгоҳ кор кардаанд, шахсоне, ки барои хизмати ҳарбии бенуқсон ва меҳнати фидокорона дар ақибгоҳ дар солҳои ҶБВ бо яке аз медалҳои “Барои Ғалаба бар Германия дар Ҷанги Бузурги Ватании солҳои 1941-1945”, “Барои Ғалаба бар Япония” ва “Барои меҳнати шоён дар Ҷанги Бузурги Ватании солҳои 1941-1945” сарфароз гардидаанд, ба миқдори 4000 сомонӣ кӯмакпулӣ дода хоҳад шуд.
Дар маҷмуъ, барои қадршиносии 6 нафар иштирокчиён ва маъюбони ҶБВ 42 ҳазор сомонӣ ва 66 нафаре, ки дар ақибгоҳ фаъолият доштаву соҳиби медалҳои зикршуда ҳастанд, 264 ҳазор сомонӣ, дар умум 306 ҳазор сомонӣ ҷудо гардидааст.
Манбаъ: Мақомоти иҷроияи ҳокимияти давлатии вилояти Суғд
Нет комментариев