Соли ду ҳазору ҳабдаҳум аз вилояти Суғд ба хориҷи мамлакат ба маблағи 505 миллион доллари Иёлоти Муттаҳидаи Амрико маҳсулот содирот шудааст. Дар ин бора сардори Раёсати минтақавии рушди иқтисод ва савдои вилояти Суғд Ҳаким Ҳакимзода зимни нишасти матбуотӣ ба рӯзноманигорон иттилоъ дод. Тибқи иттилои Ҳаким Ҳакимзода ҳаҷми гардиши савдои хориҷии вилоят дар соли гузашта ба 2 милларду 50,1 миллион доллари ИМА, аз ҷумла воридот 1 миллиарду 545,1 миллиони доллари ИМА ва содирот 505 миллион доллари ИМА баробар шуд, ки нисбати соли 2016 187,1 миллион доллари ИМА зиёд мебошад. Дар сохтори воридоту содирот тағйиротҳои мусбӣ ба назар мерасанд. Аз ҷумла, суръати афзоиши содирот нисбат ба воридот зиёд шуда, мутаносибан 13,4 ва 8,4 фоизро ташкил намудааст, — таъкид намуд сардори Раёсати минтақавии рушди иқтисод ва савдои вилояти Суғд. Иттилоъ дода шуд, ки ҳаҷми содироти маъдан дар соли 2017 ба 386,8 миллион доллари ИМА баробар шуда, дар маҷмӯъ 352,2 ҳазор тонна маъдан ва консентрат ба содирот бароварда шуда, ҳиссаи ин намуди маҳсулот дар сохтори содирот 76,6 фоизро ташкил додааст. Комёбии назаррас дар самти содирот ба фурӯш баровардани семент ба бозорҳои беруна арзёбӣ шуд. Соли гузашта 248,2 ҳазор тонна семент ба маблағи 10,3 миллион доллари ИМА содирот шудааст, ки нисбати соли 2016 мутаносибан 162,4 ҳазор тонна ва 6,2 миллион доллари ИМА зиёд мебошад.
Манбаъ: сомонаи расмии АМИТ «Ховар»
Нет комментариев