Сафорати Тоҷикистон дар Чин хабар додааст, ки айни замон дар шаҳри Вухани музофоти Хубэй — маркази пайдоиш ва паҳншавии коронавируси шакли нав 48 нафар шаҳрвандони Тоҷикистон қарор доранд, иттилоъ додааст саҳифаи расмии сафорати Тоҷикистон дар Чин.
“Айни замон 48 нафар шаҳрвандони кишвар дар музофоти болозикр қарор доранд. Ҳамаи онҳо донишҷӯёни муассисаҳои олии музофоти Хубэй мебошанд, ки бо Сафорат дар тамос шудаанд ва ё дипломатҳои тоҷик тавассути WeChat бо онҳо алоқа барқарор намудаанд”, — таъкид доштааст сафорати Тоҷикистон дар Чин.
Ҳамзамон манбаъ қайд кардааст, ки миёни беморони коронавируси шакли нав шаҳрвандони Тоҷикистон нестанд.
“Ҳукумати Чин барои пешгирии паҳншавии беморӣ тамоми чораҳоро дида истодааст. Сафорати Тоҷикистон бо мақомоти давлатии марбутаи Чин дар тамоси доимӣ буда, ҳамчунин ба шаҳрвандони Тоҷикистон, ки дар маркази пайдоиш ва паҳншавии беморӣ қарор доранд, дар доираи имкониятҳо мадад расонида истодааст”, — зикр намудааст сафорат.
Ҳамчунин сафорати Тоҷикистон дар Чин аз донишҷӯёни тоҷики муқими ин кишвар дархост кардааст, ки бо канор гузоштани баҳсҳо ва мунозираҳои беҳуда дар бораи густариши вируси асроромези тоҷдор (коронавирус) дар Чин, ки бо фавти ашхос низ ҳамроҳ мебошад, ба тавсияҳои мақомоти беҳдоштии Пекин амал кунанд.
Ба нақл аз сомонаи Сафорати Тоҷикистон дар Чин, дар ин баёния таъкид шудааст, ки кишвари қудратманди Чин аз тавоноии ҳалли мушакили густариши ин беморӣ бархурдор аст ва вазъиятро таҳти контрол дорад.
Сафорати Тоҷикистон дар Чин эълом кардааст агар ҳам зарурати хориҷ кардани донишҷӯёни тоҷик аз минтақаҳои таҳти қарантин матраҳ шавад, ин кор анҷом хоҳад шуд.
Манбаъ: https://sputnik-tj.com
Нет комментариев