Дар Сайҳун 2000 нафар сокинони шаҳру навоҳии вилоят соҳиби замин шуданд

0
272 просмотров

Марҳилаи навбатии тақсимоти заминҳои наздиҳавлигӣ ба шаҳрвандони вилоят дар шаҳраки навбунёди Сайҳун амалӣ карда шуд. Ин навбат ба 2000 нафар эҳтиёҷмандон аз шаҳри Хуҷанд ва шаҳру навоҳии атроф — Бобоҷон Ғафуров, Мастчоҳ, Чкалов, Қайроққум, Ҷаббор Расулов, Куҳистони Мастчоҳ, Истиқлол, Конибодом ва Ашт замин барои бунёди манзил тақсим карда шуд.

Раиси вилоят зимни мулоқот бо шаҳрвандони эҳтиёҷманд иброз дошт, ки тули панҷ соли охир дар вилоят 83 ҳазор нафар бо замин таъмин гардида, қисме аллакай манзил бунёд кардаанд. Дар вилоят ҳамрадиф бо Сайҳун, бунёди шаҳракҳои нав аз қабили Моҳпарӣ дар шаҳри Исфара барои 65 ҳазор нафар, Меҳробод дар ноҳияи Мастчоҳ барои 30 ҳазор нафар, Саразм дар шаҳри Панҷакент барои 25 ҳазор нафар ва Баҳористон дар шаҳри Истаравшан идома дошта, ҳадафи мақомоти иҷроияи ҳокимияти вилоят таъмини зиндагии шоистаи шаҳрвандон мебошад.

Ба шаҳраки нави Сайҳун то имруз оби нушокии хушсифат оварда шуда, ҳамчунин оби полезӣ аз дарёи Сир ва хати барқу ташноб то маркази шаҳрак кашида шудаанд. Яъне барои бунёди манзил тамоми шароитҳо муҳайё шуда, шаҳрвандон метавонанд инчунин аз хатсайрҳои Хуҷанд-Сайҳун ва Бобоҷон Ғафуров-Сайҳун ройгон истифода баранд.

Дар шаҳраки нави Сайҳун 20 микроноҳия ташкил шуда, сохтмони хонаҳои баландошёнаи истиқоматии 9-15 ошёна шаҳомати шаҳракро афзун хоҳанд намуд. Тақсимоти замин ба таври қуръапартоӣ сурат гирифт. Метавон умед кард, ки шаҳраки навбунёди Сайҳун дар ояндаи наздик воқеан хам ба шаҳри орзуву ормонҳои сокинони вилоят табдил хоҳад ёфт.

Дар ин бора http://sugd.tj/index.php/tj/navid/5282-sayhun хабар медиҳад.

Нет комментариев

Также рекомендуем