Дар Тоҷикистон ба мактаббачагон хӯроки яквақтаина дода мешавад

0
96 просмотров

Дар 2000 мактаби ноҳияҳои Тоҷикистон ба беш аз 300 ҳазор мактаббачагони синфҳои ибтидоӣ хӯроки гарм ва серғизо дода мешавад.

Вазорати маориф ва илм

Тавре ки аз Вазорати маориф ва илми Ҷумҳурии Тоҷикистон хабар доданд, ин иқдом бо дастгирии Лоиҳаи рушди Барномаи озуқавории ҷаҳонии Созмони Милали Муттаҳид оид ба «Сабук гардонидани дастрасӣ ба таҳсилот барои кӯдакони дар ҳолати осебпазир қарордошта» амалӣ мешавад.

Ошхонаи мактаб-3

Бояд зикр намуд, ки Лоиҳаи озуқаи мактабии Барномаи озуқавории ҷаҳонӣ дар таъмини хӯрок барои ҳазорон мактаббачагон аз соли 1999 инҷониб нақши муҳим бозида, тариқи афзудани нишондиҳандаҳои фарогирӣ ва давомоти хонандагон муваффақияти фавқулода ба даст овард.

Хонандагони синфхои поёнй-2

Бино ба иттилои манбаъ, мақсади барномаи таъмини озуқа барои мактаббачагон дастгирии оилаҳои камбизоат аст, ки фарзандонашон, махсусан духтарон дар мактаб таҳсил мекунанд. Дар натиҷаи амалӣ гардонидани барнома нишондиҳандаҳои фарогирӣ ва давомоти хонандагони мактабҳо хеле баланд гардид.

Ошхонаи мактаб-1

Маводи хӯрокаи Барномаи озуқавории ҷаҳонӣ бо моддаҳои витаминӣ ғанӣ гардонида шуда, дар пешгирии норасоии микроэлементҳо нақши назаррас дорад.

Бино ба иттилои Вазорати маориф ва илми Ҷумҳурии Тоҷикистон, соли 1999 барномаи таъмини хӯрок барои мактаббачагон оғоз ёфт, ки он танҳо 5 ҳазор кӯдакро дарбар мегирифт. Дар муддати якчанд сол бо ғизои мактабӣ қариб 370 ҳазор нафар кӯдакони синфҳои ибтидоӣ таъмин гашта, ҳамин тариқ он дар низоми ҳифзи иҷтимоии кишвар ҳамчун суғуртаи табақаҳои камбизоати аксари манотиқи деҳот ва берун аз он аҳамияти зиёдтар касб кардааст.

Ошхонаи мактаб-2

Барнома ба оилаҳои мактаббачагон имконият медиҳад, то маблағҳоеро, ки барои харидани маводи хӯрокӣ хароҷот мекарданд, сарфа намоянд. Инчунин он барои хонандагон ҳар рӯз як миқдори муайяни хӯроки солим ва серғизоро кафолат медиҳад. Ин дар навбати худ барои оилаҳои гирифтори норасоии маводи озуқаворӣ ва аз офатҳои табиии мавсимӣ зарардида ёрӣ мерасонад.

Барномаи озуқавории ҷаҳонӣ роҳи бисёрҷонибаи баланд бурдани зарфияти шариконро барои татбиқи лоиҳа ба кор мебарад. Барои ноил гаштан ба ин мақсад, Барномаи озуқавории ҷаҳонӣ (БОҶ) бо мақомоти худидоракунии маҳаллӣ, Вазорати маориф ва илм, Ташкилоти ғайридавлатии «Институти ғизои соҳавӣ» ва ғайра ҳамкории зич дорад.

Хонандагони синфхои поёнй-1

Бояд зикр намуд, ки дар айни замон дар саросари ҷаҳон Барномаи озуқавории ҷаҳонӣ беш аз 20 миллион кӯдакони синни мактабиро, ки аксарашон духтаронанд, бо хӯрок таъмин мекунад. Барои ноил шудан ба ҳадафҳои барномавии худ Барномаи озуқавории ҷаҳонӣ фаъолона пеш бурдани барномаҳои миллии таъмини хӯрока барои мактаббачагонро, ки барои гурӯҳҳои камбизоати аҳолӣ равона шудаанд, идома медиҳад.

Манбаъ: http://khovar.tj/

Нет комментариев

Также рекомендуем