Конфет чӣ тавр пайдо шудааст?

0
601 просмотров

Ин ширавории лазизро, ки ҳамагон бениҳоят дӯст медоранд, дар натиҷаи амали тасодуфӣ пайдо шудааст. Зиёда аз 3 000 сол пеш мисриёни қадим тасодуфан асал, анҷир ва чормағзро бо ҳамдигар омехта карда буданд ва ҳамин тавр аввалин конфет дар ҷаҳон пайдо шудааст. Ҳангоми кофтуковҳои археологӣ дар Миср як лавҳаи суратдореро пайдо карданд, ки дар он шаклу намуди конфетҳои давраи қадим ва тарзи тайёр кардани онҳо навишта шуда буд. Дар он вақт ҳоло шакар вуҷуд надошт ва мардум ба ҷои он аз асал ва хурмо дар хӯрока истифода мекарданд.

Дар мамлакатҳои Шарқ конфетро аз бодом ва анҷир тайёр мекарданд. Дар баъзе мамлакатҳои Шарқ ҳар як қабила услуби қаннодӣ ва сиру асрори тайёр кардани махсуси худро дошт. Дар давлатҳои Араб мардум ҳамарӯза намудҳои гуногуни конфетҳоро тайёр мекарданд ва дар ин ҷода хело устокор мебошанд. Маҳз арабҳо аввалин маротиба шакарро кашф намудаанд, то ки намудҳои маҳсулоти хӯрокаи қаннодиро зиёдтар гардонанд.

Дар Рими қадим чормағз ва гандуми сурхро бо асал меҷӯшониданд ва ба он седона мепошиданд. Дар натиҷа ҳалвои мағзин тайёр мешуд.

Дар Русияи қадим низ як хӯрдание ба мисли конфет мавҷуд буд, ки онро аз шарбати заранг  (кленовый сироп), шира ва асал тайёр мекарданд.

Аввалин маротиба конфетҳои шоколадӣ дар Брюссел соли 1857-ум аз тарафи дорухоначӣ Ҷоном Нойхауз тайёр карда шуда буд. Ӯ ҳангоми тайёр кардани шарбат бар зидди сулфа ногаҳон маҳсулоте ба даст овард, ки имрӯзҳо мо онро  конфетҳои шоколадӣ меномем. Дар соли 1912-ум писари Ҷоном Нойхауз конфети шоколадиро дар фурӯш ҷорӣ намуд. Қогазпечи тиллоранги  конфетҳоро бошад, ҳамсараш фикр карда баромадааст. Маҳз қогазпечи зебои конфет назари мардумро ба худ кашидааст ва ба он талабот ниҳоят бузург гардидааст.

Ин ширинии лазиз дар ҳар давру замон байни ҳама табақаҳои гуногуни одамон хело маъруф буд. Вале муддати дуру дароз конфетҳои шоколадӣ ба мардуми оддӣ дастрас набуд ва бартарияти сарватмандону табақаҳои одамони номдорро ифода мекард.

Калимаи «конфет» аз калимаи лотинии «confectum» гирифта шуда, маънояш  «тайёркардашуда» мебошад. Ин истилоҳро дар асри 16-уми дорухоначиён истифода мебурданд. Онҳо ҳама намуди меваҳои шакарпошидашуда ё коркардшударо дар мураббо «конфет»-«confectum» меномиданд, ки онҳоро бо нияти доруворӣ мепухтанд.

 

Нет комментариев

Также рекомендуем