Маошу нафақа соли 2016-ум боло меравад?

0
497 просмотров

Дар рафти суханронӣ дар ҷаласаи навбатии палатаи поёнии парлумон, ки дар он Буҷети давлатии Тоҷикистон барои соли 2016 тасдиқ шуд, вазири молияи Тоҷикистон Абдусалом Қурбониён изҳор дошт, ки масъалаи болоравии ҳаҷми музди меҳнат, нафақа, кумакпулӣ ва стипендияҳо дар соли 2016 мавриди баррасӣ қарор надорад.

«Масъалаи болоравии ҳаҷми музди меҳнат ба кормандони буҷет, нафақа барои пиронсолон, кумакпулӣ ба аҳолии камбизоат ва стипендияҳо ба иҷрои қисмати даромади буҷет вобаста аст», — иброз дошт вазир.

Ёдрас мекунем, ки дар паёми худ ба парлумон аз 23 январи соли равон президенти мамлакат изҳор дошта буд, ки бо дарназардошти рушди иқтисодиёти мамлакат ва имкониятҳои имрӯзаи молиявӣ аз 1-уми сентябри соли равон марҳалаи навбатии зиёдшавии музди меҳнати кормандони соҳаҳои буҷетӣ амалӣ карда мешавад, аммо ин иқдом амалӣ нашуд.

Дар назар буд, ки аз ҷумла музди меҳнати кормандони мақомоти ҳокимият ва идоракунии давлатӣ, кормандони мақомоти ҳифзи ҳуқуқ ва хизматчиёни ҳарбӣ 15 фоиз, кормандони муассисаҳои маориф, аз ҷумла муассисаҳои таҳсилоти томактабӣ, миёнаи умумӣ ва олӣ, дигар муассисаҳои соҳаи маориф, илм, фарҳанг, варзиш ва тандурустӣ 20 фоиз, муассисаҳои соҳаи ҳифзи иҷтимоӣ, аз ҷумла хона – интернатҳо барои пиронсолону маъюбон, шуъбаҳои кумаки иҷтимоӣ дар хона ва истироҳатгоҳу осоишгоҳҳо барои собиқадорони Ҷанги Бузурги Ватанӣ, меҳнат ва шахсони ба онҳо баробаркардашуда 25 фоиз зиёд карда мешавад.

Ҳадди ақал ва ҳадди ниҳоии нафақа аз рӯи синну сол ва нафақаи заминавӣ, инчунин нафақаҳои меҳнатии шаҳрвандон ба ҳисоби миёна то 20 фоиз зиёд карда мешаванд.

Дар баробари ин, стипендияи донишҷуён ва дигар намудҳои стипендия 30 фоиз, инчунин музди меҳнати ҳадди ақал 60 фоиз зиёд гардида, андозаи он аз 250 сомонӣ то ба 400 сомонӣ баробар мегардад.

Баъдтар дар Вазорати молия сабаби мавқуф гузоштани болоравии ҳаҷми музди меҳнат, нафақа, кумакпулӣ ва стипендияҳоро ба таъсири манфии буҳрони молӣ ба рушди иқтисоди миллӣ нисбат дода, зикр карданд, ки дар самти ҷамъоварии андозҳо ва иҷрои қисмати даромади буҷети давлатӣ вазъ дар ҷумҳурӣ мушкил аст.

Ғайр аз ин, дар Вазорати молия ҳамчунин қайд карданд, ки боз яке аз сабабҳои дигари мавқуф гузошта шудани ин амал коҳиши ҳаҷми интиқоли маблағҳои пулӣ ба кишвар ва бад шудани вазъи иқтисодӣ дар кишварҳои шарики тиҷоратии Тоҷикистон аст.

Манбаъ: http://news.tj/

Нет комментариев

Также рекомендуем

Как завести автомобиль в мороз?

 Зима – такое время года, когда особенно важно, чтобы автомобиль исправно заводился, грел салон и вёз своего хозяина по делам. Если одним морозным утром вы ...