Имрӯз дар толори маҷлисгоҳи ВКД Нишасти матбуотӣ оид ба ҷамъбасти фаъолияти хизматии мақомоти корҳои дохилӣ дар соли сипаригардидаи 2017 бо иштироки Вазири корҳои дохилӣ генерал-полковники милитсия Раҳимзода Рамазон Ҳамро ва рӯзноманигорони васеи дохилию хориҷӣ баргузор гардид. Вазири корҳои дохилӣ генерал-полковники милитсия Раҳимзода Рамазон Ҳамро намояндагони Васоити ахбори оммаро хайрамақдам гуфта, ҷиҳати ҳамкории судманд дар таъмини ҳифзи тартиботи ҷамъиятӣ, амнияти шаҳрвандон ва амалҳои хилофи қонун изҳори миннатдорӣ намуд. Зикр гардид, ки фаъолияти кормандони мақомоти корҳои дохилӣ дар матбуоти даврӣ ба таври васеъ инъикос гардиданд, ки дар ин ҷода ранҷу заҳмати масъулини ВАО назаррас мебошад. Мақомоти корҳои дохилӣ яке аз пешоҳангони мубориза бар зидди ҷинояткорӣ ва қонуншиканӣ маҳсуб ёфта, ҳамзамон кафили тинҷиву осудагӣ ба шумор рафта, кормандони милитсия дар ин самт шабонарӯзӣ фаъолият менамоянд. Дар идомаи Нишасти матбуотӣ Вазири корҳои дохилӣ доир ба вазъи ҷинояту ҷинояткорӣ дар соли 2017 дар ҷумҳурӣ муфассал маълумот дод. Зикр гардид, ки дар 12 моҳи соли 2017 дар ҷумҳурӣ 22 ҳазору 18 ҷиноят ба қайд гирифта шудааст, ки нисбат ба соли 2016 – 262 ҷиноят зиёд мебошад. Сатҳи ошкоркунии ҷиноятҳо 83,4 фоизро ташкил медиҳад. Дар давраи ҳисоботӣ чунин ҷиноятҳои вазнин ба қайд гирифта шудааст: куштор-108 роҳзанӣ-42, ғоратгарӣ- 159, таҷовуз ба номус-53, қасдан расонидани зарари вазнин ба саломатӣ-132, авбошӣ-1231, дуздӣ-5311 ҳолат, инчунин 2667 ҷинояти қаллобӣ ба қайд гирифта шудааст. Мубориза алайҳи гардиши ғайриқонунии воситаҳои нашъадор яке аз масъалаҳои доғи рӯз ба ҳисоб рафта, дар ин давра аз ҷониби кормандони мақомоти корҳои дохилӣ аз нашъаҷаллобон 2 тоннаю 700 кг воситаҳои нашъадор дарёфт ва мусодира карда шуд. Дар натиҷаи корҳои фаҳмондадиҳӣ ва ҳамкории самаранок бо шаҳрвандон аз аҳолӣ дар давоми сол 1400-адад силоҳи оташфишони ғайриқонунӣ дарёфт ва мусодира карда шуд. Дар ин давра аз ҷониби ноболиғон 690 (соли 2016 — 693) ҷиноят ба қайд гирифта шудааст, ки дар муқоиса ба соли гузашта 3 ҳолат кам мебошад. Аз тарафи ҷавонон бошад 5290 ҷиноят ба қайд гирифта шудааст.
Дар соли сипаришудаи 2017 дар ҷумҳурӣ 1303 ҳодисаи нақлиётӣ рух дода, дар натиҷа 431 нафар ба ҳалокат расида, 1400 нафари дигар ҷароҳатҳои гуногунӣ ҷисмони бардоштаанд. Дар ҷумҳурӣ 1508 ҳодисаи сӯхтор рух дода, дар натиҷа 28 нафар одамон фавтиданд, ки 11 нафарашон ноболиғ мебошанд. Маблағи зарар зиёда аз 10 миллион сомониро ташкил дода, беш аз 300 миллион сомонӣ молу мулки шаҳрвандон аз сӯхтор эмин нигоҳ дошт шуд. Дар ин муддат дар минтақаҳои гуногуни кишвар чорабиниҳои гуногуни илмӣ -амалӣ, фарҳангӣ, маданию варзишӣ, вохӯриҳо бо ҷомеа ташкил ва гузаронида шуданд. Аз ҷониби Шӯрои ҷумҳуриявии “Динамо” 3 мусобиқаи сатҳи байналмилалӣ, 5 спартакиада иборат аз 14 намуд варзиш, 9 мусобиқаи варзишӣ байни мақомоти ҳифзи ҳуқуқ, 24 мусобиқаи варзишӣ миёни дастаҳои ҷузу томҳои ВКД ва 102 бозии рафиқонаи “Футболи хурд” доир карда шуд. Варзишгарони мақомоти корҳои дохилӣ дар 11 мусобиқаи сатҳи байналмилалӣ иштирок намуда, соҳиби 46 медали тилло, 18 медали нуқра ва 39 медали биринҷӣ гардиданд. Дар идомаи Нишасти матбуотӣ рӯзноманигорон доир ба масъалаҳои вазъи ҷинояткорӣ дар ҷумҳурӣ, ошкор ва пешгирии ҷиноятҳои муташаккил, ҷиноятҳои вазнин ва махсусан вазнин, шиканҷа, чораҳои андешидашуда нисбати ноболиғони ба ҷиноят ва ҳуқуқвайронкуниҳо даст зада, раванди ислоҳоти милитсия, садамаҳои нақлиётӣ, рӯйпуш намудани ҷиноятҳо ва ҷой додани нуқтаҳои фурӯши сӯзишворӣ берун аз шаҳр ва дигар масоили мубрам ба Вазири корҳои дохилӣ саволҳо дода посухҳои мушаххас гирифтанд.
Зикр гардид, ки мақомоти корҳои дохилӣ баҳри мубориза бар зидди ҷинояткорӣ, таъмини амният, ҳифзи тартиботи ҷамъиятӣ ва ҳуқуқу озодиҳои шаҳрвандон ҳамеша дар сафи пеш қарор дошта, пайваста бо ҷомеаи шаҳрвандӣ, махсусан рӯзноманигорони матбуоти даврӣ дар робитаи қавӣ қарор дорад. Қайд гардид, ки мақомоти корҳои дохилӣ дар самти кор бо ҷавонон ба пешравиҳои назаррас ноил гардида, дар ин ҷода мунтазам чорабиниҳои гуногун доир менамояд. Ин аст, ки шумораи зиёди ҷавонони фаъоли кишвар ба корҳои ободонию созандагӣ ҷалб гардида, дар ҳифзи тартиботи ҷамъиятӣ, пешгирӣ ва мубориза бар зидди ҷинояткорӣ дар ҳамкорӣ бо мақомоти милитсия нақши арзанда мегузоранд.
Манбаъ: сомонаи расмии www.mvd.tj
Нет комментариев