Гурӯҳи “Давлати исломии Ироқу Шом (ДИИШ)” дар Тоҷикистон террористӣ эътироф шуда, фаъолияташ расман манъ шудааст. Ин қарор бо пешниҳоди Прокуратураи генералӣ аз ҷониби Суди олии Тоҷикистон қабул гардидааст.
Ҳанӯз аввали моҳи майи соли 2015 Суди олии Тоҷикистон ДИИШ-ро созмони террористӣ эътироф намуда, фаъолияти онро дар қаламрави ҷумҳурӣ мамнӯъ эълон кард.
“Дар ҷумҳурӣ феҳристи гурӯҳу созмонҳои фаъолияташон мамнӯъ дар қаламрави кишвар вуҷуд дорад, ки маълумот дар бораи чанде гурӯҳҳо аз ин рӯйхат, аз ҷумла, нисбат ба ДИИШ махфӣ аст”, — иброз дошт манбаъ аз Суди олӣ ба «Азия-Плюс».
Ҳуқуқшиноси ботаҷриба Абдуқаюм Юсуфов гуфт, ки хушбахтона, Суди олӣ сари вақт ҷомеаро аз қарор огоҳ кард.
Номбурда зикр кард, ки аз сабаби дар саросари ҷаҳон мубориза бурдан алайҳи ДИИШ, қарори суд бояд расман эълон шавад. «Гузашта аз ин, агар Суди олӣ қарори худро расман эълом дорад, ин шояд то як андозае ба кам шудани шумори тоҷикистониёни хоҳишманди пайвастан ба сафҳои ДИИШ боис гардад», — афзуд ҳуқуқшинос.
Бино ба гуфти Вазири корҳои дохилии ҷумҳурӣ Рамазон Раҳимзода, айни замон дар амалиёти ҷангӣ дар Сурия ва Ироқ шаҳрвандони Тоҷикистон низ иштирок доранд, ки ҳудуди 40 нафари онҳо бо аҳли оилаашон ба он ҷойҳо рафтаанд.
Бори дигар таърих, сабабу баҳонаҳои пайдо шудани ДИИШ, пуштибонону маблағгузорони онро мебояд ёдоварӣ кард. Тавре ки маълум аст, ДИИШ-ро хадамоти махсуси Амрико аз ҳисоби афсарони ҷангдида, вале шикастхӯрдаи артиши Саддом Ҳусейн созмон доданд.
Ҳадафи аслӣ аз таъсис додани дастаҳои сар то ба по мусаллаҳи ҷангӣ мубориза бурдан ба муқобили артиши Башшор Асад буд. Вақте ки «инқилоби мусулмонон» дар «баҳори арабӣ»-и кишвари Сурия ба шикаст дучор шуд ва дар муқоиса бо Муаммар Қаззофӣ ва дигар пешвоёни кишварҳои арабӣ Башшор Асад аз агрессияҳои Ғарбу Амрико рехту чош хӯрд, аммо нашикаст, балки мисли самандар аз хокистар берун гардид, хадамоти махсуси амрикоӣ ва исроилӣ ДИИШ-ро таъсис доданд.
ДИИШ дар муддати кӯтоҳ ба як нерӯи муқтадир ва аз ҷиҳати таркибу тартиб бонизому нисбатан устувор мубаддал гашт. Танҳо бар асари ҷасорату бебокии дастаҳои ҷанговари пешомаргии курдҳо, дастгирии молиявӣ, техникӣ ва маънавии Эрон, ҳамчунин авиатсияи нерӯҳои байналмилалӣ, хусусан кишварҳое, ки шаҳрвандонашонро ҷанговарони ДИИШ бераҳмона ва намоишкорона ба қатл расониданд (Урдун, Австралия), нерӯ ва қудрати ДИИШ то андозае кам гардид. Ба мушкилӣ ва душворӣ ҳам, ки бошад, артиши Ироқ ва дастаҳои пешомаргии курдҳо тадриҷан яке аз пайи дигаре шаҳру ноҳия ва маҳаллаҳои истиқоматиро аз таҳти назорати ДИИШ берун карда истодаанд. Ба назар мерасад, ки баъд аз муддате — дер ё зуд, ДИИШ торумор мегардад. Таърих гувоҳ аст, дар ҳама давру замонҳо хадамоти махсуси кишварҳои абарқудрат барои татбиқ кардани нақшаҳои геополитикиву геостратегии худ намегузоранд, ки ин ё он созмони муназзаму муваффақ то ба охир торумор карда шаванд. Ҳамин ҳолат дар ҷанги дуюми ҷаҳонӣ низ сурат гирифта буд. Вақте тамоми халқу ҷомеаи Амрико ва Британияи Кабир дар пеши чашми ҷомеаи ҷаҳонӣ якдилона, бо қатъият, ошкорову рӯирост ба муқобили фашизми олмонӣ бо истифодаи артиш, флот, авиатсия муборизаи хунин мебурд, хадамоти махсуси Амрико ва Британияи Кабир аз пайи таҳти назорати худ даровардани роҳбарият, бойгонӣ, алоқаву рамзҳо, боигариву сарват, пулу тилло ва ҳизби миллӣ сотсиалистии коргарии Олмон (NSDAP) шуданд.
Имрӯз низ, вақте шикасти ДИИШ наздик мегардад, хадамоти махсуси абарқудратҳои ҷаҳонӣ ҳатман кӯшишҳо мекунанд, ки аз ин созмони ҷангдидаву муназзам барои худ манфиате бардоранд.
Дар ҳайати дастаҳои ҷанговари ДИИШ аз ҳисоби зодагону шаҳрвандони кишварҳои Осиёи Миёна аслан он нафароне қарор доранд, ки барои пул ва ё бо роҳи фиреб ҷалб шудаанд. Он нафарон дар ватани худ ягон заминаи иҷтимоӣ надоранд. Илова ба ин ҳам дар Афғонистон (самти эҳтимолии ҳаракати ҷанговарони ДИИШ) ҳам дар сарҳадҳои кишварҳои Осиёи Миёна нерӯҳои қавии ҷангӣ қарор доранд, ки аз ӯҳдаи безарар гардонидани гурӯҳҳои ҷанговар мебароянд. Ҳам дар Афғонистону ҳам дар кишварҳои Осиёи Миёна асосан мусулмонони суннимазҳаб – пайравони мазҳаби Имоми Аъзам иқомат мекунанд, ки усулан ва амалан муқобили ҳар гуна хунрезӣ ва ҷангу нооромӣ баромад мекунанд. Ба фарқ аз сокинони кишварҳои арабӣ истиқоматкунандагони ҷумҳуриҳои собиқи шӯравӣ (Тоҷикистон, Ӯзбекистон, Қирғизистон, Туркманистон ва Қазоқистон) эҳсоси баланди ватандӯстӣ (патриотизм) доранд, ба иғвову фитна ба осонӣ дода намешаванд.
Бинобар ҳамин, овозаву хабарҳо дар бораи ворид шудани дастаҳои ҷангии ДИИШ ба кишварҳои Осиёи Миёнаро метавон дурӯғи санҷишӣ номид.
Президенти Ҷумҳурии Тоҷикистон, Пешвои миллат Эмомалӣ Раҳмон зимни суханронӣ дар Ҷаласаи васеи Шӯрои амнияти дастаҷамъии Созмони Аҳдномаи Амнияти Дастаҷамъӣ, ки чанде қабл дар шаҳри Маскав баргузор гашт, аз вазъи имрӯзаи ҷаҳон изҳори нигаронӣ карда, гуфт, ки Тоҷикистон барои мубориза бо хатарҳои терроризм тамоми тадбирҳоро амалӣ менамояд.
Президенти кишвар дар ҳамоиши сарони давлатҳои аъзои СААД ширкат ва суханронӣ кардаву изҳор доштааст, ки «вазъи имрӯзаи ҷаҳон аз мо тақозо мекунад, то барои муқовимат бо таҳдиду хатарҳои терроризму экстремизми байналхалқӣ тадбирҳои муассири дастаҷамъона андешем”.
Сарвари давлат таъкид намудааст, ки «вазъи зудтағйирёбанда дар минтақа бо ҷалби нерӯҳои нав ҳолати мураккаби пешгӯинашавандаро ба миён овардааст ва дар назди созмон вазифаҳои нави бетаъхир мегузорад».
Президенти Ҷумҳурии Тоҷикистон Эмомалӣ Раҳмон инчунин зимни суханронӣ оид ба фош сохтани таблиғгарон, пешгирии ҷалби ҷавонон аз шомилшавӣ ба гурӯҳҳои тундрав, вазъи сарҳадҳои кишварҳои СААД, пурзӯр кардани нерӯҳои низомӣ барои мубориза бо хатарҳои нав андешаронӣ намудааст.
Се соли зиндони ду ҷавони тоҷик барои тарафдорӣ аз ДИИШ
Додгоҳи ноҳияи Исмоили Сомонии шаҳри Душанбе ду ҷавони тоҷикро бо иттиҳоми пайвастан ба гурӯҳи террористии “Давлати исломӣ” ва тарғиби ин гурӯҳ 3 солӣ аз озодӣ маҳрум кардааст.
Аз додгоҳи мазкур ба “Озодагон” гуфтанд, Маҳмадалӣ Файзуллоев, донишҷӯи соли дуюми факултаи иқтисодии Донишгоҳи славянии Тоҷикистону Русия охирҳои моҳи апрели соли 2015 тавассути шабакаи иҷтимоии “odnoklassniki” дар бораи ташкилоти экстремистии “Давлати исломӣ” маълумот пайдо намуда, “бо мақсади бо роҳи зӯроварӣ тағйир додани сохти конститутсионии Тоҷикистон ба ин гурӯҳ шомил шуда, тавассути телефони мобилии “SAMSUNG” аз шабакаи интернет навор ва расмҳои тарғибкунандаи “Давлати исломӣ”-ро дастрас намудааст.
Манбаъ меафзояд, ӯ навор ва аксҳои мазкурро тариқи “Вайбер” ба шиносҳояш — Ганҷинамо Наимова, Бузургмеҳр Қосимов, Низом Шоназриев, Шукрона Насриддинова, Ҷамшед Боев ва дигарон фиристодааст.
Додгоҳи Исмоили Сомонӣ мегӯяд, Маҳмадалӣ Файзуллоев ва Ҷамшед Боев дар асоси моддаи 3073, қисми 2-юми Кодекси ҷиноӣ “ташкили иттиҳоди экстремистӣ (ифротгароӣ) муҷрим шинохта шуда, ҳар кадом се сол аз озодӣ маҳрум гардиданд. Ин мӯҳлатро дар калонияҳои ислоҳии дорои низомаш умумӣ пушти сар мекунанд.
Ҳаводори тоҷики «Давлати исломӣ» 12 сол зиндонӣ шуд
Додгоҳи ноҳияи Исмоили Сомонӣ як сокини шаҳри Душанберо, ки ҳудуди чор моҳи пеш аз Миср ба Тоҷикистон истирдод шуда буд, барои пайравӣ аз гурӯҳи “Давлати исломӣ” 12 сол равонаи зиндон кард.
Додгоҳи ноҳия сокини шаҳри Душанбе Улуғбек Сангиновро, барои талоши иштирок дар задухӯрдҳои мусаллаҳона ё амалиёти ҷангӣ дар қаламрави кишварҳои дигар гунаҳкор дониста, ба 12 сол зиндон ва нигаҳдорӣ дар маҳбаси низомаш сангин маҳкум кард. Дафтари матбуоти додгоҳи Исмоили Сомонӣ ба Озодӣ гуфтааст, ки ин ҳукм ҳафтаи гузашта содир шуда, аммо ҳанӯз қувваи қонунӣ нагирифтааст.
Ба қавли манбаъ, Улуғбек Сангинов моҳи июли соли гузашта ҳангоми парвозаш аз фурудгоҳи Шарм-уш-шайхи Миср ба Истанбул боздошт шуда, баъдан ба Тоҷикистон истирдод шудааст: «Ӯ дар аввалҳои соли гузашта аслан ба муҳоҷирати меҳнатӣ ба Маскав рафта, дар он ҷо тақрибан чор моҳ кор кардааст. Вале Рауф Акбаров ном як сокини деҳаи Бедаки ноҳияи Рашт зимни корҳои сохтмонӣ ва ҳангоми намозхонӣ дар масҷиди “Проспект Мира” (метрои Новокузнетск) Улуғбекро барои иштирок дар ҷиҳод алайҳи ҳукумати Башор Асад ташвиқ кардааст.»
Масъулони додгоҳ мегӯянд, ки ин ташвиқ боис шудааст, то Улуғбек Сангинов майдони корро дар Русия партофта, ба сӯи майдонҳои ҷанг дар Сурия роҳ пеш бигирад. Баъд аз ин, Сангинов моҳи июл аз Маскав ба Қоҳира рафта, чанд муддат дар як таҳхона дар пойтахти Миср умр ба сар бурдааст. Аммо ӯро ҳангоми парвоз аз фурудгоҳи Шарм-уш-шайхи Миср ба сӯи Истанбул, ки қасд дошт аз онҷо ба Сурия гузарад, боздоштанд.
Худи Улуғбек Сангинов дар мурофиаи додгоҳӣ иқрор кардааст, ки ҳадафи парвозаш ба Истанбул аз он ҷо рафтан ба Сурия ва пайвастан ба созмони террористии “Давлати исломӣ” будааст. Вале ӯ дар мурофиаи додгоҳӣ гуфтааст, ки вақте аз Душанбе ба муҳоҷирати корӣ рафта буд, аслан дар бораи ҷиҳод ва созмони «Давлати исломӣ» тасаввурот надошт.
Мақомоти Тоҷикистон бо изҳори нигаронӣ аз афзоиши шумори шаҳрвандонаш дар сафи гурӯҳҳои тундраве, чун “Давлати исломӣ”, барои онҳое, ки ихтиёран аз Сурияву Ироқ бармегарданд, авфи гуноҳ пешниҳод кардаанд. Бино ба иттилои мақомот, то ҳол ҳудуди 40 тан аз шаҳрвандони тоҷик бо эҳсоси пушаймонӣ аз пайвастани худ ба “Давлати исломӣ” аз Сурияву Ироқ ба Ватан баргашта, мавриди авф қарор гирифтаанд.
Бовар ва умед дорем, ки пас аз хондани ин мавод шаҳрвандони Тоҷикистон хулосаҳои зарурӣ бароварда, худ ва пайвандону наздиконашонро зери азобу шиканҷа намегузоранд. Ҳаргиз кӯшиши пайвастан ба сафи гурӯҳи террористии ба ном “Давлати исломӣ”-ро намекунанд.
Нет комментариев