Дар ноҳияи Шаҳристон ба муносибати гусели даъватшавандагон ҷамъомади тантанавӣ баргузор гардид ва гуруҳи наздик 50 нафараи ихтиёриён ба сафи Қувваҳои мусаллаҳи Ҷумҳурии Тоҷикистон сафарбар карда шуданд.
Дар ин бора аз мақомоти иҷроияи ҳокимияти давлатии ноҳия иттилоъ дода, афзуданд, ки ин ҷамъомад бо иштироки роҳбарияти ноҳия, кормандони комиссариати ҳарбӣ, волидони даъватшавандагон ва фаъолони ноҳия дар комиссариати ҳарбии ноҳия сурат гирифт.
Дар рафти ҷамъомад таъкид карда шуд, ки ҷавонони ноҳия бо ҳисси баланди ватандӯстӣ ихтиёран барои адои хизмат мераванд. Маҳз фааъолнокии ҷавонон буд, ки дар рӯзи нахустин нақшаи даъвати ҳарбӣ ба андозаи 104 фоиз иҷро карда шуд.
Ноҳияи Спитамен аз иҷрои нақшаи даъвати ҳарбӣ гузориш дод
Дирӯз дар варзишгоҳи марказии «Чашма»-и ноҳияи Спитамен бо иштироки роҳбарияти ноҳия маъракаи гусели ҷавонон ба сафи Қувваҳои мусаллаҳи Ҷумҳурии Тоҷикистон баргузор шуд.
Дар ҷамъомади тантанавӣ таъкид карда шуд, ки соли ҷорӣ нахустин маротиба дар таърихи ноҳияи Спитамен дар рӯзи аввали гусели ҷавонон ба Артиши миллӣ нақшаи муайяншуда ба пуррагӣ иҷро гардида, зиёда аз 165 нафар ҷавонон барои ҳифзу ҳимояи Ватан сафарбар карда мешаванд.
Дар натиҷаи тадбирҳои андешидаи мақомоти иҷроияи маҳаллии ҳокимияти давлатии ноҳия якҷоя бо сохторҳои дахлдор ҳисси ватандӯстии наврасону ҷавонон рӯз аз рӯз баланд гардида, онҳо дар озмунҳои фаннӣ, мусобиқаҳои мухталифи варзишӣ ва дигар чорабиниҳо фаъолона иштирок намуда, ба гирифтани ҷойҳои намоён сазовор мегарданд ва имрӯз ихтиёран ба сафи Қувваҳои муссалаҳи кишвар сафарбар шудани ҷавонон натиҷаи корбарии мунтазам аст.
Дар баробари ин изҳори боварӣ карда шуд, ки наваскарони ноҳияи Спитамен қарзи шаҳрвандии худро бо сарбаландӣ иҷро намуда, дар ҳифзи марзу бум ва осоиши мардуми кишварамон саҳми арзанда мегиранд.
Баъдан чорабинии ҳарбӣ-ватандӯстӣ ва фарҳангӣ, ки аз ҷониби қисмҳои ҳарбии ҳудуди ноҳия ва бахши фарҳанги ноҳия омода гардида буд, пешкаши ҳозирон гардонида шуд.
Ашт. Гуруҳи 100 нафараи ихтиёриён ба хизмати ҳарбӣ фиристода шуданд
Гуруҳи 100 нафараи ихтиёриён аз ноҳияи Ашт барои адои хизмати ҳарбӣ ба сафи Қувваҳои мусаллаҳи Ҷумҳурии Тоҷикистон фиристода шуданд ва ҳамин тавр ноҳияи Ашт дар рӯзҳои нахустини гусели даъватшавандагон нақшаи пешбинишударо 60 фоиз иҷро намуд.
Ба муносибати гусели даъватшавандагон 4 октябри соли равон дар назди муассисаи давлатии Театри мусиқӣ-драммавии ба номи Маҳмудҷон Воҳидови ноҳия ҷамъомади тантанавӣ доир гардид. Раиси ноҳияи Ашт Зариф Мирдадо зимни суханронии худ дар ҳузури даъватшавандагон ва волидони онҳо иброз дошт, ки имрӯзҳо дар сафи Қувваҳои Мусаллаҳи Ҷумҳурии Тоҷикистон ҳазорҳо ҷавонони аз ҷиҳати ҷисмонӣ обутобёфта, зираку чолок ва ватандӯст сарбаландона хизмат менамоянд, ки бо нерӯи худ дар таҳкими сулҳу суботи кишвар ҳиссаи муносиб мегузоранд.
Дар ин рӯз аз тарафи роҳбарияти ноҳия ва комиссариати ҳарбии ноҳия ба як қатор фаъолон ва падару модарон номаи миннатдорӣ ва Сипосномаву туҳфаҳои хотиравӣ тақдим гардид. Дар охир барномаи ҷолиби фарҳангӣ манзури иштирокдорон гардонида шуд.
Манбаъ: Хадамоти матбуоти Раиси вилояти Суғд
Нет комментариев