Раиси вилояти Суғд Раҷаббой Аҳмадзода дар арафаи Иди саиди Қурбон бошандагони Хона-интернати беморони руҳӣ дар ноҳияи Ҷаббор Расуловро аёдат намуд.
Раҷаббой Аҳмадзода зимни аёдат иброз дошт, ки бо ҳидоятҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қишри ниёзманди ҷомеа ба таври доимӣ ба аёдату ғамхорӣ фаро гирифта мешаванд. Аз тарафи Раиси вилоят ба кулли бошандагони муассисаи иҷтимоӣ туҳфаҳои идона тақдим гардид ва барои беморон дастархони идона ороста шуд.
Дар ин рӯз Раиси вилоят ҳамзамон собиқадори меҳнат, сокини шаҳри Хуҷанд Фотима Самадоваро аёдат намуд. Фотима Самадова муаллимаи хизматнишондодаи Иттиҳоди Шӯравӣ буда, дар муассисаи таҳсилоти миёнаи умумии раками №1-уми шаҳри Хуҷанд ба ҳайси омӯзгори математика-физика солҳои тӯлонӣ фаъолият намудааст. Собиқадори соҳаи маориф умри бобаракати худро дар тарбияи насли наврас сарф намудааст ва хизматҳояшро давлату Ҳукумат пайваста қадршиносӣ мекунанд. Раҷаббой Аҳмадзода аз фаъолияти назарраси Фотима Самадова ёдоварӣ намуд ва барояш саломатии бардавом таманно кард.
Сипас, Раиси вилоят Дадо Аюбови 87 соларо аёдат намуда, ӯ ва аҳли оилаашро ба муносибати Иди Қурбон табрик намуд. Номбурда сокини ноҳияи Бобоҷон Ғафуров буда, духтуруи дараҷаи олӣ мебошад. Собиқадори соҳаи тандурустӣ Дадо Аюбов ҳамчун табиби ҳозиқ барои нигаҳдории солимии ҷомеа хизматҳои арзанда намудааст.
Манбаъ: Хадамоти матбуоти Раиси вилояти Суғд
Нет комментариев