Рақибони дастаи мунтахаби Тоҷикистон оид ба футбол дар доираи мусобиқоти интихобии қаҳрамонии Осиё-2017 миёни духтарони то 19-сола маълум шуданд. Бар асоси қуръакашӣ тими мунтахаби Тоҷикистон дар гурӯҳи Б бо ҳамтоёни худ аз кишварҳои Узбекистон, Тайван, Ҳонконг ва Покистон майдондорӣ хоҳанд кард. Интизор аст, ки рақобатҳо дар гурӯҳи «Б» аз 29-уми октябри соли равон то 6-уми ноябр дар Варзишгоҳи марказии ҷумҳуриявӣ баргузор шаванд. Футболбоздухтарони тоҷик нахустин дидори худро бо ҳарифони покистонӣ 29 октябр анҷом медиҳанд. Бозӣ бо тими Узбекистон 31-уми октябр сурат хоҳад гирифт. Дар даври сеюм, ки 2-юми ноябр дар назар аст, хубони футболбози тоҷик бо ҳамтоёни тайвании худ қувва меозмоянд. Дар охирин дидори гурӯҳӣ футболбоздухтарони мо 6 ноябр бо тими мунтахаби Ҳонконг майдондорӣ мекунанд.
Ёдрас мешавем, ки мувофиқи тартиби муқаррарӣ дастаҳо ба чор гурӯҳ тақсим гардидаанд. Чор дастаи ғолиби гурӯҳҳо ба мусобиқаи қаҳрамонии Осиё-2017 роҳхат мегирад ва ба чор дастаи беҳтарини мусобиқаи охирини қитъавӣ Ҷопон, Кореяи Шимолӣ, Кореяи Ҷанубӣ ва Чин ҳамроҳ мешаванд. Дар марҳилаи ниҳоии мусобиқаи қаҳрамонии Осиё миёни духтарони то 19-сола ҳамагӣ ҳашт даста ширкат меварзад.
Манбаъ: http://khovar.tj
Нет комментариев