Дар партави дастуру ҳидоятҳои Асосгузори сулҳу ваҳдати миллӣ–Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади татбиқи ҳадафҳои “Солҳои рушди деҳот, сайёҳӣ ва ҳунарҳои мардумӣ” дар шаҳри Истаравшан бо иштироки меҳмонони хатсайри сайёҳии «Бунҷикат», ки бо ибтикори Кумитаи рушди сайёҳии назди Ҳукумати Ҷумҳурии Тоҷикистон ва мақомоти иҷроияи ҳокимияти давлатии вилояти Суғд баҳри муаррифии имкониятҳо ва тақвияти сайёҳии дохилӣ ташкил карда шудааст, конференсия дар мавзӯи «Сайёҳии дохилӣ-омили рушди иқтисодиёти кишвар» баргузор гардид.
Дар конференсия муовини раиси шаҳри Истаравшан Олимҷонзода Толиб, мудири шуъбаи рушди сайёҳии вилояти Суғд Абдумаҷид Раҳимов, директори ТҶ ассотсиасияи тараққиёти сайёҳии «Зарафшон» Ҷамшед Юсупов, мудири бахши рушди сайёҳии шаҳри Истаравшан Азамат Ҷӯраев ва Директори Коллеҷи ҳунарҳои мардумии шаҳр Хоҷа Насриддин суханронӣ намуданд.
Таъкид гардид, ки соҳаи сайёҳӣ дар Ҷумҳурии Тоҷикистон яке аз соҳаҳои афзалиятнок ба ҳисоб рафта, баҳри рушди ин соҳа як қатор барномаҳои давлатӣ қабул гардида, мавриди татбиқ ва амал қарор доранд. Рушди соҳаи сайёҳии байналмиллалӣ барои сайёҳони хориҷӣ ва дар ин замина ташкил намудани инфрасохтори сайёҳӣ, меҳмонхонаҳо, фароғатгоҳҳо метавонад махсусан барои ҷавонони шаҳр, дар муҳайё намудани ҷойҳои нави корӣ, заминаи воқеӣ гузорад.
Махсусан қайд карда шуд, ки бо дарки мафҳуми рушди сайёҳӣ аҳолии шаҳри Истаравшан сатҳу сифати хизматрасониро ба сайёҳон сол аз сол беҳтар намуда, дар ҷамоатҳои деҳоти шаҳр марказҳои тиҷоратӣ, ошхонаҳо, меҳмонхонаҳо ва нуқтаҳои фӯруши сӯзишворӣ барои хизмат расонидан ба меҳмонону сайёҳон фаъолияти пурсамар доранд. Таҳлил ва ҳисоботҳои омории воридшавии сайёҳони дохилӣ ва хориҷӣ дар шаҳр шаҳодат медиҳад, ки вобаста ба хусусиятҳои табиию рекреатсионии кишвар аз ҷониби туристони хориҷӣ афзалият ба навъҳои сайёҳии экологӣ, варзишӣ, кӯҳӣ ва экстремалӣ дода мешавад. Дар ин замина иншоотҳои самти санаторию курортӣ ва миқдори зиёди минтақаҳои истироҳатии шаҳри Истаравшан барои ташкили истироҳат ва муолиҷаи сайёҳони дохиливу хориҷӣ заминаи хуб фароҳам меоваранд.
Мавриди зикр аст, ки тадбири мазкур яке аз ташаббусҳои Ҳукумати Ҷумҳурии Тоҷикистон барои муаррифии зарфиятҳои хоси сайёҳии кишвар арзёбӣ гардида, дар самти афзун гардонидани шумули маконҳои сайёҳӣ ва ба вуҷуд овардани имконоти зарурӣ ҷиҳати қабули сайёҳони дохилию хориҷӣ заминаи мусоид фароҳам меоварад.
Манбаъ: Хадамоти матбуоти Раиси вилояти Суғд
Нет комментариев