Дар майдони «Ситораҳои Хуҷанд»-и маркази маъмурии вилояти Суғд ҷамъомади тантанавӣ баргузор гардид, ки дар он ба ғолибони даври дуюми мусобиқаи меҳнатӣ дар мавсими имсолаи ҷамъоварии пахта мукофотҳо тақдим карда шуданд.
Дар ин ҷамъомад, ки бо ҳузури фаъолон, роҳбарону кормандони ташкилоту муассисаҳо, сарраёсати кишоварзии вилоят ва раисони шаҳру ноҳияҳо ҷараён гирифт, Раиси вилояти Суғд Раҷаббой Аҳмадзода низ иштирок намуд.
Баъди сухани ифтитоҳии муовини Раиси вилоят Ориф Хоҷазода қарори якҷояи Сарраёсати кишоварзӣ ва кумитаи иттифоқи касабаи коркунони комплекси агросаноатии вилоят қироат карда шуд. Тибқи қарори мазкур дар 20-рӯзаи дуюми пахтачинӣ ноҳияи Ашт ҷойи аввал ва ноҳияи Зафаробод ҷои дуюмро ишғол карданд.
Дар 20-рӯзаи дуюми маъракаи пахтачинӣ пахтакорони ноҳияи Ашт наздик 5 ҳазор тонна ва кишоварзони ноҳияи Зафаробод 8600 тонна пахта ҷамъоварӣ намудаанд.
Дар байни ҷамоатҳо Ҷамоати деҳоти Овчиқалъачаи ноҳияи Бобоҷон Ғафуров беҳтарин дониста шуд.
Раиси вилоят Раҷаббой Аҳмадзода ба ғолибон мукофотҳои пулиро мутаносибан дар ҳаҷми 20 ҳазор сомонӣ, 10 ҳазор сомонӣ ва 5 ҳазор сомонӣ тақдим намуда, ба чинакчиёни беҳтарин низ туҳфаҳои хотиравӣ супорид.
Ҳамзамон ба шарафи ғолибони мусобиқаи меҳнатӣ «Парчами шараф» барафрохта шуд.
Манбаъ: Хадамоти матбуоти Раиси вилояти Суғд
Нет комментариев