Асоси бахту саодат ва раҳнамои корам – Радиои ”Тироз” аст!

0
38 просмотров

Мегӯяд собиқ корманди техникии Ширкати телевизион, радио ва рекламавии “Тироз” Маҳмудхӯҷа Мӯъминов.

Ин навбат қаҳрамони маводи мо, ки дар доираи омодасозии силсиламавод ба ифтихори ҷашни саиду фархунда, 15-солагии пахши нахустин барномаи Радиои маҳбуби шаҳрвандон “Тироз” таҳти унвони “Садои ошно” омода ва пешниҳоди Шумо-хонандагони арҷманди Медиапортали “Тироз” мегардад, собиқ корманди техникии ширкат, яке аз фаъолони соҳа ва пешсафони ин даргоҳи бузурги фарҳангу иттилоот Маҳмудхӯҷа Мӯъминов мебошад.

Муаррифнома

М.Мӯъминов 24-уми июли соли 1979 дар шаҳри Хуҷанд, аз оилаи коргар ба дунё омадааст. Пас аз хатми мактаби миёна хост соҳиби маълумоти олӣ низ гардад. Вале, аз сабабҳои иқтисодиву оилавӣ натавонист ба муроди дили хеш бирасад.

Чун номи меросиро аз бобояш гирифтааст ва қиблагоҳии авлоди Мӯъминовҳо (бобои Маҳмудхӯҷа) дар давоми ҳаёт касби муҳосибиро бар зимма доштанд, сараввал кӯшиш намуд, то мувофиқ ба ному кори бобояш амад намояд. Ин буд, ки дар курси кӯтоҳмуддат (семоҳа)-и компютерии Донишгоҳи давлатии муосир (СГУ) таҳсили хешро оғоз бахшид. Аммо, нав як моҳи таҳсил гузашта буду ӯро аз кӯча кормандони комиссариати ҳарбии шаҳр дошта, ба хизмати ҳарбӣ сафарбар намуданд. Давоми ду сол дар сафи Қувваҳои Мусаллаҳи Тоҷикистон (дар қисми ҳарбии шаҳри Қӯрғонтеппа) сарбаландона ва софдилона хидмати Модар-Ватанро ба ҷо оварда, аз мактаби мардонагӣ гузашт.

Ҳамин тавр, пас аз хизмат боз таҳсили хешро дар ҳамон курси компютерии СГУ давом дод ва онро бомуваффақият хатм намуда, соли 2000-ум соҳиби Сертификати “муҳосиби коргузор” гардид.

Баъд бо Маҳмудхӯҷа чӣ рӯй дод? Инро беҳтараш худи ӯ гӯяд, зеро дар урфият гуфтаанд: “Сухан аз забони луқмон хуш аст!”

  • Маҳмудхӯҷа Шумо чӣ тавр барои кор ба Радиои “Тироз” омадед?
  • Ба ростӣ худам ҳам намедонистам, ки тақдиру насиб маро барои фаъолияти корӣ бо Радиои “Тироз” мепайвандад. Аслан пас аз хатми мактаби миёна давоми 4 моҳ дар нонвойхона чун нонвойчӣ кор ва дар курси компютерӣ таҳсил мекардам. Рӯзе Директори генералии Ширкати “Хуршед-продакшн” (гурӯҳи эҷодию рекламавӣ) мӯҳтарам Хуршед Ӯлмасов бо воситаи устодам бо ман тамос гирифта, барои кор даъват намуданд. Чунон хурсанд шудам, ки бовар мекунед, чи хеле мегӯянд, дар куртаам намеғунҷидам. Зеро, дар он сол ин ширкат дар байни мардум обрӯву эътибори баланд дошт. Ҳамин тавр, ба назди Х.Ӯлмасов омада, ба қабули гарму самимонаи ин шахси мӯътабар ноил гардидам. Аз он рӯз эътиборан чун шогирди Х.Ӯлмасов пазируфта ва бо кори графикаи компютерӣ машғул шудам. Баъд аз як соли корамон Ширкати телевизион, радио ва рекламавии “Тироз” ба таври расмӣ ба пахши барномаҳои худ шурӯъ намуд.

Muminov-Mahmudhuja--1

  • Яъне, Шумо як сол пеш аз оғози расмии фаъолияти Радиои “Тироз” ба кор омадед ва гуфтан мумкин аст, ки саҳми хешро дар омодасозии барномаву гуфторҳои нахустини радио гузоштед?
  • Бале, вале албатта саҳми ночиз ё худ кӯчаки худро. Ҳамин тавр, санаи 1-уми марти соли 2001-ум аввалин барномаи Радиои “Тироз” дар мавҷи 103,7 FM дар фазои кишварамон садо дод. Ин рӯз барои кулли кормандони радио ва шахсан барои ман хеле таърихиву муқаддас аст.

Баъд аз паси сар намудани давраи шогирдӣ то соли 2011-ум дар вазифаи коргардони овоз фаъолият намудам.

  • Чун давраи шогирдиро гузаштеду 11 сол ба ҳайси коргардони овоз фаъолият намудед, киро ҳамчун устоди хеш мешуморед?
  • Пеш аз ҳама Раиси ширкат Хуршед Азимҷоновичро чун устоди худ меҳисобам. Зеро, натанҳо маро ба кор даъват карданду бо кор таъмин намуданд, балки ҳамаи нозукиҳои техникаю кор кардан бо онро фаҳмонида, хеле хуб омӯзониданд. Аз ин сабаб, ба ман ҳаққи бузурги устодӣ доранд ва ҳамеша бо номи неку кори хайри он кас ифтихор дораму меболам ва хеле миннатдорам.

Ҳамчунин, устодон Акбар Зоҳидов, Салимҷон Камолов, Андрей Столбитсов, Олим Темуров ба қавле “дасти манро рост намудаанд”, ки аз онҳо низ сипосгузорам.

  • Солҳои фаъолиятатон дар Радиои “Тироз” барои Шумо-кормандони техникӣ оё тамоми шароити корӣ муҳайё буданд?
  • Бале, аз тарафи роҳбарияти ширкат на танҳо барои кормандони техникӣ, балки барои коргарони эҷодӣ низ ҳамаи шароит муҳайё карда шуда буданд. Чун мо дар паҳлӯи ҳамдигар ва дар як бинову зери як бом бо эҷодкорони радио кор мекардем, ҳар рӯз инро эҳсос менамудем.

Ҳар рӯзу ҳар соат аз рафти кори мо огоҳ мешуданду барои пешрафти фаъолият маслиҳатҳои хуб медоданд ва моро ҳамаҷиҳата дастгирӣ мекарданд.

techniks

  • Дар давраи фаъолияти Шумо боре ҳам шудааст, ки роҳбарияти ширкат таҷҳизоти техникии радиоро нав ё иваз карда бошад?
  • Роҳбарият шабу рӯз дар фикри он буданд, ки пеш аз ҳама сифати пахши барномаҳои радио баланд бошад. Бо ин мақсад якчанд маротиба таҷҳизотҳои наву замонавиро харидорӣ намуда, барои истифодабарӣ аз онҳо, пешниҳоди мо мекарданд. Масалан, хуб дар хотир дорам, ки дар солҳои кориам таҷҳизотҳоро ба монанди мавҷпахшкунак (передатчик), мавҷпахшкунаки иловагӣ (запасной передатчик), таҷҳизотҳои махсус барои автоматизатсияи эфир, автоматизатсияи барномаҳои мусиқӣ, автоматизатсияи блоки рекламавӣ ва ғайраҳоро борҳо харидорӣ намуда, ба истифода додаанд.

 

  • Дар ҳамон солҳо шумораи кормандони техникӣ чанд нафарро ташкил медод?
  • Дар он солҳо мо-кормандони техникӣ 6-7 нафар будем ва кӯшиш мекардем, ки ҳамаи корҳоро дар асоси ҷадвали аз ҷониби роҳбарияти ширкат қаблан тасдиқшуда ва дар вақту соати муайянгардида иҷро намоем. Шояд пешравиву муваффақияти корамон ҳам дар ҳамин буд.

 

  • Таваҷҷӯҳи роҳбарияти ширкат дар самти баландбардорӣ ё такмили ихтисоси кормандони техникӣ чи гуна буд?
  • Барои баландбардории ихтисоси кормандони техникӣ таваҷҷӯҳу эътибори роҳбарияти ширкат бениҳоят зиёд буд. Зеро, корманди ихтисосу маҳорати баланддошта ба пешрафти кори радио сабабгор мешавад. Бо ин мақсад шахсан ман бо пешниҳоду дастгирии Директори генералии ШТРР “Тироз” Хуршед Ӯлмасов соли 2006-ум дар семинари якҳафтаинаи тахассусӣ, яъне барои техникҳо, ки дар шаҳри Душанбе гузаронида шуда буд, иштирок намудам ва бисёр баҳраманд шудам. Ҳоло ҳам он чиҳоро, ки аз семинар омӯхтам, дар кори ҳаррӯзаам истифода карда истодаам. Ҳамчунин, чун сафари корӣ дар шаҳри Панҷакент (як ҳафта) ва ноҳияи Ашт будам.
  • Имрӯз ҳамчун шунаванда ва мутахассис ба сифати пахши барномаҳои радио аз ҷиҳати техникӣ чӣ гуна баҳо медиҳед?
  • Баҳои “Аъло”, зеро сифати пахш беҳтар, истҳо (паузаҳо) хеле кам, гуфтан мумкин нестанд.
  • Мактаби “Тироз” шахсан барои Шумо чӣ дод?
  • Мактаби “Тироз” барои шахсан ман чун “трамплин” ҳисобида мешавад. Зеро, коре, ки намедонистаму боре ҳам иҷро накардаам, маҳз дар ҳамин даргоҳи муқаддас омӯхтам. Ин буд, ки роҳбарияти ширкат чанд маротиба кори манро қадр намуда, барои гирифтани Ифтихорномаҳои Раиси вилоят ва ШТРР “Тироз” пешниҳод намуд.
  • Шунидем, ки дар Радиои “Тироз” на танҳо ба муваффақиятҳои корӣ ноил шудед, балки ҳамсари якумра ва бахту саодати хешро маҳз аз ҳамин даргоҳ дарёфтед. Ҳамин тавр?                 
  • Дуруст, вале Шумо аз куҷо шунидед? Пас аз чанд соли корам дар ширкат, духтараке ба кор омад, ки зебо, ширинсухан, нармгуфтор, боодобу хушахлоқ буд ва Мубашширахон Бақоева ном дошт. Моҳ аз моҳу сол аз сол ба ҳамдигар меҳр бастему ҳамдигарро дӯст доштем ва дар ниҳоят оила барпо намудем. Ҳатто, базми домодию арӯсии моро роҳбарият ва кормандони ширкат дар сатҳи олӣ ташкил ва баргузор карданд, ки барои ин ҳам, ману ҳамсарам аз онҳо хеле миннатдорем. Ҳоло падару модари се фарзанди дилбанд ва ширин ҳастем. Аз ҳама хушбахтии ман дар он аст, ки ҳоло модари дуогӯю насиҳатгарам дар ҳаётанд ва барои мо-фарзандону набераҳо раҳнамову қуввати дил мебошанд!
  • Хеле хуб, Маҳмудхӯҷа агар Шуморо бо саволдиҳии хеш каме хаста карда бошем, узр. Хоҳони онем, ки имрӯзу ҳамарӯз саломату саодатманд ва некному сарбаланд бошеду дар фаъолият ҳамеша комёбу шарафманд ва пешсаф.

Ҷашни 15-солагии Радиои “Тироз” барои Шумо ва кулли кормандони дирӯзу имрӯз мубораку фархунда бошад!           

Нет комментариев

Также рекомендуем