Дар меҳмонии ohang.tj

0
816 просмотров

Дунё бо тарона зебост. Савту навои дилангез метавонад, ки қалби миллионҳоро ба шӯр оварад. Аз ин хотир, рӯз аз рӯз шумораи мусиқиҳо афзуда истодаанд. Қариб як сол мешавад, ки дар кишвари азизи мо сомонае таҳти унвони  www.ohang.tj ба фаъолият шурӯъ кардааст ва барои якояки мо таронаҳои ҷадидро ба таври таъҷилӣ дастрас намуда истодааст.

Аз ин лиҳоз, мо хостем бо асосгузори сомонаи мазкур – Абдуҳаким Абдуфаттоев мусоҳиба ороста бошем:

Абдуҳаким Абдуфаттоев 8-уми июни соли 1995 дар шаҳри Исфара, дар оилаи зиёӣ чашм ба олами ҳастӣ кушодааст. Соли 2003 барои истиқомат кардан ба шаҳри Хуҷанд омада, Гимназияи рақами 2-юми шаҳри Бӯстонро хатм кардааст. Алъон ӯ донишҷӯи курси 4-уми  Донишкадаи иқтисод ва савдои Донишгоҳи давлатии тиҷорати Тоҷикистон буда, дар соҳаи информатикаи иқтисодӣ таҳсил карда истодааст. Маҳз ӯ таъсисдиҳандаи сомонаи www.ohang.tj маҳсуб мешавад.

 Иқдоми таъсис додани сомонаи ohang.tj кай тавлид ёфт?

Лоиҳаи таъсис додани он якчанд муддат дар фикри ман буд. Дар охир сомонаи www.ohang.tj аз санаи 1-уми феврали соли 2015 фаъолияти худро оғоз намудааст.

 Мақсади сохтани сомонаи мазкур дар чист?

Бояд тазаккур дод, ки ҳоло мо дар асри 21 зиндагӣ дорем ва алъон замони илму техника аст. Ҳатто ҳангоми аз хоб хестан низ мо ба шабакаи интернет ворид мешавем. Бо сохтани сомонаи мазкур хостам, ки мардумро аз хабару навгонӣ ва таронаҳои нави тоҷикӣ бархурдор намоям. Рости гап, аввал ман сомонае таъсис доданӣ будам, ки таҳти унвони Surud.Ru буд ва дар он ҷо ҳама таронаҳои ҷаҳонро гузоштанӣ будам. Баъдан фикр кардам, ки дар шабакаи интернет ин тавр сомонаҳо зиёданд, аз ин лиҳоз хостам, ки танҳо сурудҳои тоҷикиро ба мардум пешкаш намоям. Ба хулосое омадам, ки сомонаро низ ба таври тоҷикӣ номгузорӣ намоям. Рӯзе аз телевизион клиперо дидам, ки дар он навишта шуда буд:  “оҳанги …” яъне, ному насаби оҳангсоз зикр гардида буд. Сипас, ҳамин номро интихоб намудам ва ба сомона номи www.ohang.tj-ро бахшидам.

    Боиси таҳсину офарин аст, ки тамоми сурудҳои навро ба таври фаврӣ ба сомона ҷой медиҳед, то ки мухлисони савту наво зуд бархурдор гарданд. Оё ашхоси дигаре ҳастанд, ки барои ба сомона ҷой додан ба Шумо кӯмак мерасонанд?

Ашхоси дигари ба сомона воридкунанда нестанд, танҳо худам сурудҳоро дар сомона ҷой мекунам. Ду нафар шариконам ҳастанд, ки мавод ё видеоклипҳоеро, ки ба сомона мегузорам, дар шабакаҳои иҷтимоӣ тарғиб мекунанд. Яке аз шаҳри Душанбе ва дигаре аз шаҳри Конибодом мебошанд.

Мебинем, ки рӯз аз рӯз сомонаатон рӯ ба шукуфоӣ дорад. Оё он сарпараст дорад?

Мутаассифона, сарпараст надорад. Сарпарасти сомона  шахсан худам, яъне Абдуҳаким Абдуфаттоев мебошам.

Асосан, бо киҳо ҳамкорӣ доред?

Аз рӯзе, ки сомона созмон дода шуд, бо сарояндагони эстрадаи тоҷик: Анвар Ахмедов, Гуласал Пулодова, Ғолибҷон Юсуфов, Дилноза Каримова, Соҳиб Назриев, Фотима Машрабова, Ҷонибек Муродов ва дигарон ҳамкорӣ дорем. Як қатор  шабакаҳои радиои, инчунин бо ширкатҳои Топ-Медиа ва  Студияи Муҳаммад равобити ногусастанӣ дорем.

Дар оянда сомонаи www.ohang.tj барои мо чӣ армуғон (сюрприз)-ҳо омода карда истодааст?

Дар оянда сомонаи ohang.tj дар шаҳри Бӯстон ансамбли созию овозии “Навои Бӯстон”-ро ташкил карданӣ аст. Ба наздикӣ тавассути рекламаҳо аз он хабардор хоҳед гашт. Инчунин нақшаҳо дорам, ки дар ояндаи наздик дар амал татбиқ хоҳем кард. Он идеяҳо барои беҳтар намудани хизматрасонӣ ва дохил кардани якчанд вазифаҳои нав, ки аз гуфтани он худдорӣ мекунам (сюрприз аст), пешкаши истифодабарандаҳои азиз хоҳанд гашт.

Дар охир гуфтаниям, ки дӯстони азиз, агар дар сомонаи мо камбудиҳоро мебинед ё ки аз он ҷо таронаи дӯстдоштаи худро намеёбед, дилгир нашавед ва ҳатман ба мо муроҷиат намоед. Мо меӯшем, ки ҳамаи онро барои Шумои азиз ҳарчӣ зудтар дастрас намоем, чунки кору фаъолияти мо танҳо барои Шумост! Ҳамеша бо мо бошед!

Ташаккур!

Нет комментариев

Также рекомендуем

Крем барои кӯдакон

Истифодабарандагони гироми, дар бахши имруза мо бароятон маълумотеро дар бораи крем барои кудакон пешкаш мекунем. Аввалин маротиба дар даврони иттиходи шурави истехсоли креми кудаконро солхои ...