Тибқи нақшаи қаблан тасдиқшуда ва дар мувофиқа бо Мақомоти иҷроияи ҳокимияти давлатии шаҳри Хуҷанд ва Шӯъбаи маорифи шаҳр рӯзи душанбе, санаи 21-уми ноябр, пас аз нисфирӯзӣ вохӯрии Гурӯҳи корӣ ва муаррифии Лоиҳаи “Харитаи экологӣ”-и шаҳри Хуҷанд дар Муассисаи таълимии миёнаи умумии рақами 2-юми шаҳри Хуҷанд баргузор гардид. Дар он беш аз 150 нафар устодон ва хонандагони мактаб иштирок намуданд.
Директори мактаб Муқаддасхон Азимова вохӯриро ифтитоҳ намуда, ҳадафи онро шарҳ дод.
Узви гурӯҳи корӣ, муҳаррири лоиҳа Исломҷон Бобоев доир ба мақсад ва вазифаҳои асосии Лоиҳаи мултимедиавии “Харитаи экологӣ”-и шаҳри Хуҷанд ба таври муфассал сухан гуфта, лоиҳаро муаррифӣ кард.
Таъкид гардид, ки лоиҳа бо иқдоми ШТРР “Тирози Ҷавонӣ” ва Медиапортали “Тироз” Лоиҳаи мултимедиявӣ (бисёррасонавӣ)-и “Харитаи интерактивии бакҳо ва қуттиҳои партов, нуқтаҳои қабули фурӯзонакҳои каммасрафи корношоям, макони оббозӣ (пляж) ва ҳоҷатхонаҳои ҷамъиятии шаҳри Хуҷанд” роҳандозӣ ва бо дастгирии Мақомоти иҷроияи ҳокимияти давлатии шаҳри Хуҷанд дар амал татбиқ шуда истодааст.
Мақсади лоиҳа – ин ҳамкории ВАО бо аҳолӣ ва сохтору идораҳои дахлдори Мақомоти иҷроияи ҳокимияти давлатии шаҳри Хуҷанд мебошад, ки он барои иттилоотонии саривақтии шаҳрвандон ва тарбияи экологии насли наврас ва ҷавонон равона гардидааст.
Ҳадафи дигари лоиҳа мусоидат кардан ба огоҳии иттилоотӣ ва баландбардории маърифати экологии шаҳрвандон маҳсуб мешавад. Ҳамчунин, барои дар оянда ташкил намудани “Минтақаи сабз” дар шаҳр, ба навъҳо ҷудокунии партовҳо мусоидат хоҳад кард. Боз як мақсади лоиҳа ин ташкили садд (монеа)-и иттилоотӣ – барои ба амал омадани партовгоҳи беиҷозат (стихиявӣ) мебошад.
Вазифаҳои асосии лоиҳа ин муайян кардани вазъияти кунунии (маҳаллаву микроноҳияҳо, шумора, ҷадвали корӣ) бак ва нуқтаҳои партов, ҳоҷатхонаҳои ҷамъиятӣ, нуқтаҳои қабули фурӯзонакҳои каммасрафи корношоям мебошад. Ҳамзамон, муқоиса намудани (мувофиқатӣ) макони мавҷуда ва шумораи нуқтаҳои мазкур: нуқтаҳои воқеӣ бо нишондод дар харитаи ташкилот ё муассисаи идоракунӣ аст. Дар марҳилаи аввал барои рушди лоиҳа муайян кардани замима (илова)-ҳо ба харитасозӣ ва баъдан бо мултимедиявӣ зарур мебошад. Мониторинги ҳаррӯзаи нуқтаи бардоштани партов ва пешниҳоду инъикоси натиҷаи он – дар харитаи интерактивӣ низ ногузир аст.
Бояд гуфт, ки Лоиҳа бо дастгирии Намояндагии Internews Network дар Тоҷикистон ва Мақомоти иҷроияи ҳокимияти давлатии шаҳри Хуҷанд, шахсан Раиси шаҳри Хуҷанд мӯҳтарам Шарифзода Шариф Файз амалӣ хоҳад шуд. Лоиҳа барои пурратар гардонидани фазои иттилоотии кишвар, бахусус шаҳри Хуҷанд мусоидат хоҳад кард. Лоиҳа инноватсионӣ буда, формати он мултимедиявӣ (бисёррасонавӣ) мебошад.
Зикр гардид, ки мӯҳлати давомнокии даври аввали лоиҳа 3 моҳ буда, дар он 10 маҳаллаи шаҳри Хуҷанд: Пахтакор, Раззоқ, Панҷшанбе, Гулбаҳор, Бофандаи соҳили чапи дарё ва микроноҳияҳои 8-ум, 13-ум, 20-ум, 32-юм ва 34-уми соҳили рости дарё мавриди истифода ва санҷиш қарор мегиранд.
Шаҳрвандони фаъол, бахусус ҷавонону насли наврас — мактабхонон низ дар амалишавии лоиҳаи “Харитаи экологӣ”-и шаҳри Хуҷанд иштирок карда, саҳми арзандаи хешро гузошта метавонанд. Барои ин онҳо метавонанд аксҳои бо таҷҳизоти мобилии худ гирифтаашонро вобаста ба мавҷудияти партов дар кӯчаҳои шаҳр, аз ҷумла маҳалли зисти хеш, тавассути Вотсапп (Whatsapp) ба рақами 92-882-66-66 ирсол намоянд.
Аксҳои фиристодаи онҳо фавран дар Медиапортали «Тироз» www tiroz.org бахши «Эко-харитаи Хуҷанд» ҷой дода мешаванд. Иштирокчиёни фаъолро тӯҳфаҳои арзанда мунтазир аст!
Дар қисми дуюми вохӯрӣ байни гурӯҳи корӣ, ки ба он аъзои дигари лоиҳа Акбарҷон Рофиев, Султонҷон Усмонов, Фарҳодҷон Ҷӯраев низ ҳамроҳ буданд ва устодону толибилмон дар мавзӯи тарзу усули гирифтан ва фиристодани аксҳо саволу ҷавоб сурат гирифт.
Ҳамин тавр, муаррифии Лоиҳаи мултимедиявии “Харитаи интерактивии бакҳо ва қуттиҳои партов, нуқтаҳои қабули фурӯзонакҳои каммасрафи корношоям, макони оббозӣ (пляж) ва ҳоҷатхонаҳои ҷамъиятии шаҳри Хуҷанд” хеле ҷолиб ва барои иштирокдорон – устодону хонандагони Муассисаи таълимии миёнаи умумии рақами 2-юми шаҳри Хуҷанд муфиду хотирмон ба интиҳо расид.
Гурӯҳи кории Лоиҳаи “Харитаи экологӣ”
Нет комментариев