Дар шаҳрҳои саноатии вилояти Суғд бахшида ба Соли нави мелодӣ то 31 декабр ярмарка — фурӯши маҳсулоти кишоварзӣ гузаронида мешавад.
Субҳи рӯзи гузашта дар назди Театри мазҳака-мусиқии ба номи Камоли Хуҷандии маркази вилоят бахшида ба Соли нави мелодӣ ярмарка — фурӯши маҳсулоти кишоварзӣ баргузор шуд.
Раиси вилояти Суғд Раҷаббой Аҳмадзода рафти ярмарка — фурӯши маҳсулоти кишоварзиро мавриди таваҷҷуҳ қарор дода, аз растаҳои гуногун боздид намуд.
Раиси вилоят ҳамзамон дар назди сокинон ва масъулини ташкилоту идораҳо суханронӣ намуда, аз ҷумла қайд кард, ки таъмини амнияти озуқавории мамлакат, ғанӣ гардонидани бозорҳои истеъмолӣ ва баланд бардоштани сатҳи некӯаҳволии аҳолӣ яке аз самтҳои афзалиятнок ва муҳими сиёсати давлатии Ҳукумати Ҷумҳурии Тоҷикистон маҳсуб ёфта, дар ин ҷода таҳти раҳнамоии бевоситаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тадбирҳои зарурию судманд амалӣ карда мешавад.
Таъкид гардид, ки дар доираи амалигардонии сиёсати хирадмандонаю дурбинонаи Ҳукумати Ҷумҳурии Тоҷикистон аз тарафи Мақомоти иҷроияи ҳокимияти давлатии вилояти Суғд ба рушди соҳаи кишоварзӣ таваҷҷуҳи хоса зоҳир мегардад.
Дар натиҷаи тадбирҳои андешидашуда давоми ёздаҳ моҳи соли ҷорӣ ҳаҷми умумии истеҳсоли маҳсулоти кишоварзӣ дар ҳамаи шаклҳои хоҷагидории вилоят наздик ба 7,5 млрд. сомонӣ расид, ки дар муқоиса нисбати ҳамин давраи соли гузашта 107,6 фоизро ташкил мекунад. Дар ин давра ҳаҷми истеҳсоли ғалладонагиҳо ба 268,6 ҳазор тонна, картошка 416 ҳазор тонна, сабзавот 508,87 ҳазор тонна, полизиҳо 112,2 ҳазор тонна, мева 135,1 ҳазор тонна, ангур 61,2 ҳазор тонна, гӯшт 39,9 ҳазор тонна, шир 234,1 ҳазор тонна, тухм зиёда аз 193,9 млн. дона, асал 1,4 ҳазор тонна ва гӯшти моҳӣ ба 199 тонна баробар гашт, ки дар муқоиса нисбати ҳамин давраи соли пешин афзоиши аксарияти номгӯи нишондиҳандаҳои истеҳсолӣ аз 101,5 то 134,5 фоиз таъмин карда шудааст.
— Бо мақсади баланд бардоштани сатҳи зиндагии мардум ва мусоидат дар таъмини захиракунии маҳсулот аз тарафи аҳолӣ, махсусан дар шаҳрҳои саноатӣ гузаронидани ярмарка-фурӯши маҳсулоти кишоварзӣ ба ҳукми анъана даромада, пайваста чунин чорабиниҳо доир карда мешаванд, — илова намуд Раиси вилоят.
Иттилоъ дода шуд, ки дар соли 2018 дар шаҳрҳои саноатии Хуҷанд, Бустон, Гулистон ва Истиқлол дар маҷмӯъ 50 маротиба чунин ярмаркаҳо ташкил гардида, дар онҳо зиёда аз 3566,3 тонна маҳсулот бо нархҳои 20-30 фоиз арзон пешниҳод гардид.
Баргузории ярмарка — фурӯши маҳсулоти кишоварзӣ бахшида ба Соли нави 2019-ум дар шаҳрҳои саноатӣ аз имрӯз оғоз гардида, то санаи 31 декабр идома меёбад.
Манбаъ: Хадамоти матбуоти Раиси вилояти Суғд
Нет комментариев