Тоҷикистон дар Ҷоми Аврупо соҳиби ҷои сеюм шуд

0
715 просмотров

Дастаи мунтахаби наврасони то 18 солаи Тоҷикистон дар Ҷоми Аврупо оид ба дзюдо, ки санаҳои 2-3-юми апрел дар шаҳри Твери Русия баргузор шуд, соҳиби як медали тилло гардид.
Ёқубҷон Назиров дар рақобатҳо дар вазни то 81 килограмм баъди ду пирӯзӣ бар Владимир Сечин ва Манаф Набиев аз Русия дар вохӯрии нимниҳоӣ боз як гӯштингири рус Назар Меншиковро ба мағлубият дучор карда, дар қувваозмоии ниҳоӣ Иван Дубинаро аз Беларус шикаст дод ва соҳиби ҷойи аввал ва медали тилло гардид.
Ҷоми Аврупо барои гӯштингирони навраси тоҷик дувумин мусобиқаи байналмилалӣ дар мавсими имсола ба шумор меравад. Ба ҳайати мунтахаби наврасони Тоҷикистон 9 варзишгар аз зумраи писарон шомил буданд.
Темур Маҳмадов дар вазни зери 81 килограмм ҷойи панҷум ва Шамоили Ҷаҳонгир дар вазни то 73 кило мақоми ҳафтумро ба даст оварданд.
Дар Ҷоми Аврупо оид ба дзюдо байни наврасон дар Твери Русия 274 варзишгар (172 писар ва 102 духтар) аз 14 кишвар (10 кишвари Аврупо ва 4 кишвари Осиё) иштирок намуданд.
Дар ҳисоби умумидаставӣ мунтахаби Русия бо касби 50 медал (14 тилло, 10 нуқра ва 26 биринҷӣ) зинаи аввал, мунтахаби Қазоқистон 1 ҷои аввал, се дувум ва се сеюм ҷойи дувум ва мунтахаби Тоҷикистон бо 1 медали тилло, як ҷойи панҷум ва як ҷойи ҳафтум зинаи сеюмро соҳиб шуданд.
Ёдовар мешавем, ки дастаи мунтахаби наврасони Тоҷикистон дар Ҷоми Аврупо оид ба дзюдо байни наврасони то 18-сола, ки санаҳои 5-6-уми марти соли равон дар шаҳри Анталияи Туркия баргузор шуда буд, ҳамин гуна соҳиби як медали тилло гардид, ки онро низ Ёқубҷон Назиров ба даст овардааст. Ӯ дар силсилаи рақобатҳо дар вазни то 81 килограмм баъди чор пирӯзӣ дар қувваозмоии ниҳоӣ Гоча Гвачлианиро аз Гурҷистон мағлуб кард.

Манбаъ: http://khovar.tj/

 

Нет комментариев

Также рекомендуем