Дар чаҳорчӯби рақобатҳои даври дуввуми марҳилаи гурӯҳии Лигаи қаҳрамонҳои Аврупо, дар гурӯҳи “D”, бошгоҳи “Реал Мадрид”-и Испания бо дастаи “Шериф”-и Молдова рақобат намуд. Вохӯрии дастаҳо дар варзишгоҳи маъруфи “Сантяго Бернабеу” доир гардид. Набарди дастаҳо тезу тунд ҷараён гирифта, бо ғалабаи ғайриинтизорӣ меҳмонон ба поён расид. Аз оғоз бозиро футболбозони “Реал” идора мекарданд ва пайваста дар хатти ҳамла қарор мегирифтанд. Аммо, ҳисоби бозӣ на аз ҷониби мадридиҳо, балки бо голи ба самар расонидаи футболбози ӯзбакистонии “Шериф” – Ҷасур Яхшибоев боз карда шуд. Дар дақиқаи 25-уми рақобат, нимҳимоятгари ӯзбакистонӣ аз партофти Кристиано истифода бурда, тӯбро бо сар вориди дарвозаи Тиллоии Куртуа намуд. Қисми якуми бозӣ бо ягона голи меҳмонон ба охир расид.
Бо шурӯъ гардидани нимаи дуюми бозӣ шогирдони Карло Анчелоти ҳамлаҳои хавфноки худро суръат бахшиданд. Бозингарони “Реал” фурсатҳои зиёдеро ба миён меоварданд, вале ба таври бояду шояд аз он истифода карда наметавонистанд. Пас аз ҳуҷумҳои зиёди мизбонон билохира дар дақиқаи 65-ум меҳмонон тоб наоварда, ҳамлагари “Реал” – Винисиус Жуниорро дар дохили ҷаримагоҳи худ аз пой афтониданд. Барои ин амал довар ҷониби дарвозаи “Шериф” пеналтӣ таъйин кард. Пеналтиро Карим Бензема ба гол табдил дод ва натиҷаи бозиро баробар (1:1) кард.
Футболбозони “Шериф” дар ин дидор танҳо 3 зарбаи мустақим ҷониби дарвозаи “Реал” доштанд, ки дутои он табдил ба гол шуд. Аммо, мадридиҳо дар умум 31 зарба (11 зарбаи мустақим) суйи дарвозаи дастаи молдовӣ равон карданд, ки танҳо яктои он ба гол мубаддал гардид ва он ҳам аз зарбаи ҷаримавии ёздаҳметра.
Дар дақиқаи 89-ум нимҳимоятгари дигари “Шериф” – Себастян Тилл маротибаи дуюм дарвозаи Куртуаро рахна кард ва голи пирӯзиро ба номаш рақам зад.
Ҳамин тавр, дастаи “Шериф” дар сафар “Реал”-и овозадорро бо ҳисоби 2:1 дучори шикаст намуда, бо ба даст овардани шаш имтиёз ба садри ҷадвали гурӯҳи “D” баромад. “Гаразмониҳо” бо касби се хол дар ҷойи дуюм қарор доранд.
Манбаъ: varzishtv.tj
Нет комментариев