«Пари Сен-Жермен» оиди рафтани ҳамлавар Килиан Мбаппе замоне эълон мекунад, ки футболбози фаронсавӣ дар мавриди шартномаи корӣ бо «Реал» ба мувофиқа мерасад ва кулли ҳуҷҷатҳо барои гузариш ба тими испаниро чун футболбози озод имзо менамояд. Дар ин бора журналист ва инсайдери маъруфи итолиявӣ Фабрисио Романо дар шабакаи иҷтимоии X (пештар Twitter) хабар медиҳад.
Ёдовар мешавем, ки пештар оиди оне хабар баромад, ки Килиан Мбаппеи 25-сола охирин ҷузъиёти шартномаи кориро бо «Реал»-и Мадрид дуруст карда истодааст. Қарордоди корӣ миёни ҷонибҳо рӯзи 1-уми июли соли 2024 ҳукми қонунӣ пайдо мекунад. Роҳбарияти дастаи мадридӣ мехоҳад раванди имзокунии шартнома бо Мбапперо ҳафтаҳои наздик ба анҷом расонад.
Мбаппе дар сафи «ПСЖ» аз соли 2017 баромад дошта, ҳамлавари 25-сола бо парижиҳо 13 ҷоиза ба даст овардааст. Ин мавсим форвард 34 бозӣ дар ҳамаи мусобиқаҳо гузаронида, ба задани 34 гол ва ирсоли ҳафт партофти голӣ даст ёфтааст. Шартномаи бозигар бо тими фаронсавӣ бошад то охири моҳи июни соли ҷорӣ мӯҳлат дорад. Арзиши тахминии футболбоз тибқи фарзияи сомонаи Transfermarkt, – 180 млн евро мебошад.
Манбаъ: Варзиш-ТВ
Нет комментариев