Чорабинии вилояти «Сайри харбуза», «Иди асал» ва намоиш фурӯши маҳсулоти кишоварзӣ ба истиқболи 25-умин солгарди Истиқлолияти давлатии Ҷумҳурии Тоҷикистон дар майдони назди муҷассамаи Камоли Хуҷандии маркази вилоят баргузор гардид.
Дар ин майдон кишоварзон аз ҳамаи шаҳру ноҳияҳои вилояти Суғд анвои гуногуни харбуза, маҳсулоти замбӯри асал ва меваю сабзавоти шаҳдбори худро ба намоишу фурўш гузоштанд.
Дар чорабинии «Сайри харбуза» кишоварзони 10 шаҳру ноҳияи вилоят навъҳои гуногуни харбузаҳоро аз қабили «Мирзочўлӣ», «Асадӣ», «Оби набот», «Қирмизӣ», «Сурхмева», «Гулобии сабз», дар маҷмўъ беш аз 20 намудро ба намоишу фурўш гузоштанд. Дар ҷойи баргузории «Сайри харбуза» пирамида, хаймаҳо , нуқтаҳои намоиши харбузабурӣ, маҳсулоти аз харбуза коркардшуда ба маъраз гузошта шуд.
Ба «Иди асал» бошад Ассотсиатсияҳои замбӯрпарварони вилоят ва 12 шаҳру ноҳия бо дастовардҳои худ иштирок намуданд ва навъҳои гуногуни асал, прополис ва ғайра бо банду баст тибқи талаботи меъёрҳои тасдиқгардида пешниҳод гардид.
Дар доираи баргузории «Сайри харбуза» озмун ва мусобиқаҳо бо шарту шароити шавқовар гузаронида шуд. Аз ҷумла озмуни зуд хӯрдани харбуза ва шашкабозӣ бо воситаи харбузаҳо хеле шавқовар сурат гирифт. Ба ғолибони озмунҳо тўҳфаҳои хотиравӣ тақдим шуд.
Дар як гўшаи майдон санъаткорони вилоят намоиши ҷолиби фарҳангӣ пешкаш намуданд ва макони баргузории чорабинӣ ба идгоҳи воқеӣ табдил ёфт.
Ба намоиш-фурӯш номгӯйи зиёди маҳсулоти кишоварзӣ низ ворид гардида, маҳсулот бо нархҳои 30 то 50% аз бозор арзон ба сокинону меҳмонони шаҳри Хуҷанд пешниҳод карда шуд.
Нет комментариев