Парвариши кабудӣ дар фасли зимистон

0
911 просмотров

Барои он ки дар майдончаи назди ҳавлиатон баҳори барвақт пиёз, ҷаъфарӣ(петрушка),

шибит (укроп) ва дигар намуди кабудӣ рӯяд, зарур аст, ки тухмии онро ҳанӯз дар оғози фасли зимистон коред.

Қайд кардан зарур аст, ки нахуст бояд сирпиёз(чеснок) шинонида шавад. Беҳтар мешуд, агар онро ба ҷое, ки пештар бодиринг рӯёнида шуда буд, шинонед. Дар як метри квадратии замини нармкардашуда,  5-7 кг поруи пӯсида, намаки калий ва дар як метри он  15 -25 грамм суперфосфат пошед. Ба замин бояд оҳак низ ҳамроҳ намуд. Тақрибан 12 рӯз, пеш аз шинонидани сирпиёз ҷӯякҳо кашида мешаванд. Зарур аст, ки замини ҷӯякҳо андаке нишинад. Ҳангоми шинонидани кабудӣ байни донаҳои сирпиёз 7-8 cантиметр, байни хатҳо бошад, 20-30 сантиметр масофа гузошта мешавад. Баъди шинонида шудани сирпиёз, болои он бо поруи сӯхта, поруи пӯсида ва баргҳо пӯшонида мешавад.

Дар баробари шинонидани сирпиёз, гузоштани масофаро фаромӯш накарда, метавонед пиёз коред. Дар вақти шинонидан байни он 3-5 см ва байни ҷӯякҳо 12-20 см масофа гузоред. Баъдан поруи пӯсида ва торф пошед. Ҳангоми фаро расидани сармо зарур аст, такроран поруи пӯсидашуда пошед ва ғафсии он 7-8 сантиметрро ташкил диҳад. Бояд пиёз дар ҷое шинонида шавад, ки болояш дар фасли зимистон аз барф пур гардад, зеро барфи зиёд ҳосилро аз сардиҳо нигоҳ медорад.

Вақте ки ҳарорати ҳаво то 3 -4 дараҷа поён мефарояд, дар ҷӯякҳои фасли тирамоҳ омодашуда, метавонед навъҳои зироатҳои ба хунукӣ тобоварро, аз қабили сабзӣ, ҷаъфарӣ, салат, лаблабу ва карам коред.

Барои кишти давраи зимистон нисбат ба баҳорӣ, зарур аст, ки 25-30 фоиз бештар тухмӣ истифода бурда шавад.

Ин аст, чанд маслиҳати мо оид ба шинонидани кабудӣ, агар мувофиқи дастури пешниҳодшуда амал кунед, ҳанӯз дар охири фасли зимистон рӯйи дастурхони шуморо шибиту ҷаъфарии тару тоза оро хоҳанд дод.

Нет комментариев

Также рекомендуем